Ongi etorri Legegunea atarira

Ebazpen honen xedea da betekizunak, moduak eta eskabideetarako epeak eta ebaluazio-prozedurak eta maila-esleipena arautzea, 2011ko ekitaldiko Osakidetzako profesionalen ebaluazioaren eta lanbide garapenaren ohiko deialdian.

Osakidetzako Zerbitzu Erakundeetan zerbitzu aktiboan edo antzeko egoeran dauden lanbide talde guztietako profesional finkoek eta ez-finkoek eska dezakete prozesu honetan parte hartzea.

Azaroaren 22ko 395/2005, otsailaren 27ko 35/2007 eta abenduaren 26ko 248/2007 Dekretuetako 4 eta 5 artikuluekin bat, orain aitortuta daukatenaren justu goragoko maila eskatu eta aitortu daiteke. Osakidetzan edo Osasun Sistema Nazionalean maila aitortu gabe dutelako, Sarrera Mailan dauden profesionalek I. Mailako aitorpena bakarrik eska dezakete.

Ebaluazio negatibo baten ondorioz, aurreko deialdian eskatutako maila lortu ez duten profesionalek «ebaluazio berri bat egitea eska dezakete deialdia egin eta bi urte igarotakoan», «behin betiko maila-esleipenaren ebazpena ematen denetik aurrera», Lanbide Garapeneko Dekretuetako 11.4 artikuluen arabera.

Aldi baterako barne-sustapenean dagoen pertsonalak izendapen finkoa dueneko kategorian bakarrik eska dezake lanbide garapena, eta kategoria horri dagokion lanbide garapenaren osagarria jasotzeko eskubidea izango du.

Eskabidea egitea borondatezkoa da. Interesatuak eskabidean honako hau egiaztatu beharko du: eskatzen diren betekizunak betetzen dituela edo eskabideak aurkezteko epean beteko dituela.

Azaroaren 22ko 395/2005, otsailaren 27ko 35/2007 eta abenduaren 26ko 248/2007 Dekretuetako 5. artikuluaren arabera, eta ekainaren 3ko 106/2008 Dekretuko eranskinaren 5. atalaren arabera, betekizun hauek ezartzen dira ebaluazioaren eta lanbide garapeneko mailaren aitorpenaren deialdian parte hartzeko:

1. Aitorpena eskuratu nahi duen kategorian zerbitzu aktiboan edo antzeko egoeran egotea Osakidetzan, Osasun Zerbitzuetako pertsonal estatutarioaren Estatutu markoaren gaineko abenduaren 16ko 55/2003 Legean araututakoaren arabera:

   1. Enplegu finkoa duten langileentzat, eskabideak aurkezteko epean.

   2. Langile ez-finkoentzat, eskabideak aurkezteko epe hasieran edo epeko uneren batean.

2. Osakidetzan plaza jabetzan duten langile finkoek edo aldi baterako berriro lanean hasi direnek, Osakidetzan lan egiten dutela egiaztatu beharko dute aitorpena lortu nahi duten kategorian. Aurkeztuko den deialdi aurreko azken hiru urteetan gutxienez urtebeteko zerbitzua izan behar du.

3. Ekainaren 3ko 106/2008 Dekretuaren arabera, Osakidetzan plaza jabetzan ez duen pertsonal finkoak Osakidetzan lanean diharduela egiaztatu beharko du, aitorpena lortu nahi duen kategorian, eta zerbitzu aktiboan edo antzeko egoeran dagoela, aurkeztuko den deialdiaren aurreko hiru urtetan zehar.

4. Pertsonal ez-finkoak hiru urteko zerbitzuak egiaztatu behar ditu Osakidetzan, aitorpena eskatzen duen kategorian, eskabidea aurkezteko epea hasi aurreko azken bost urtetan.

   Era berean, EPEko azken prozesuan parte hartu duela ere egiaztatu beharko du, eta eskatu duen kategoriako azterketa ere egin duela, ezinbesteko kasuan izan ezik eta betiere dagokion eskabidea egin bada. EPE horretan Kategoria deitu ez bada, justu aurreko EPEko kategoriaren deialdia hartuko da erreferentziatzat..

5. Aitorpena eskatuko duen kategorian 5 urteko zerbitzuak izan behar ditu eginda.

   Egindako zerbitzuak kalkulatzeko honako hauek hartuko dira kontuan: zerbitzu aktiboan edo plaza-erreserbarako eskubidea duten antzeko egoeran egindako denboraldiak, Osasun Sistema Nazionalean edo Europar Batasuneko kide diren Estatuetako Osasun Sistemetan antolamendu aldetik eta funtzionalki integratutako Osasun Erakundeetan egindako zerbitzuak.

   1. Azaroaren 22ko 395/2005 Dekretuaren eta otsailaren 27ko 35/2007 Dekretuaren arabera araututako profesionalentzat, honako hau hartuko da kontuan:

      Aitorpena eskatu duen kategoriako edo lanbide-talde bereko beste kategoria batzuetako, eta hala badagokio espezialitateko, lanpostu funtzionalak betetzea, baldin eta horiek betetzeko Lizentziatuaren edo Diplomatuaren titulazio sanitarioa eskatzen bada, Osasun Zientzietan espezialisten titulu ofizialak lortzeko egindako prestakuntza-urteak izan ezik, salbu zerbitzu espezialeko egoeraren bidez eginak izan badira.

      Ikerketako Zentro Ofizialetan edo Osasun Sistema Nazionalari atxikitako erakundeetan pertsonal ikertzaile gisa egindako zerbitzuak, betiere Lizentziatu edo Diplomatuaren titulazio sanitarioa eta dagokion espezialitatea eskatzen duen kontratua badu.

      Etengabeko atentzio-zerbitzurako kontratatu gisa egindako zerbitzuak.

   2. Abenduaren 26ko 248/2007 Dekretuaren arabera araututako profesionalentzat, honako hau hartuko da kontuan:

      Aitorpena eskatu dueneko kategoriako lanpostu funtzionalak betetzea, edo bestelako kategoria batzuetakoak, baldin eta lanbide-talde berekoak edo goragokoak badira.

      1984ko ekainaren 14ko Osasun Ministerioaren Aginduak ezarritakoaren arabera, «teknikari funtzioetako erizaintzako laguntzaile» gisa egindako zerbitzuen denbora Teknikari Espezialisten kategorian zenbatuko da lanbide garapenerako.

      Aitorpena eskatzen deneko kategorian beste Administrazio Publikoetan egindako zerbitzuei % 50eko balioa emango zaie.

6. Eskatutako maila lortzeko behar diren egindako zerbitzu-urteak betetzea.

   Kategorian egindako zerbitzuei, bertan gutxienez bost urte egin badira, Osasun Sistema Nazionalean edota Europar Batasuneko kide diren Estatuetako Osasun Sistemetan beste lanbide-talde batzuetan egindako zerbitzuak gehitu ahal zaizkie, honako balioen arabera:

   (Ikus .PDF)

   Ekainaren 3ko 106/2008 Dekretuko eranskinaren 5. atalean 2. puntuan ezarritakoarekin bat, «Profesional bakoitza ohiko lehen deialdian aurkezten denean, ezartze-aldian lortutako azken mailarako behar diren zerbitzuez gaindiko egindako zerbitzuak zenbatuko dira mailara iristeko».

Partaide bakoitzak eskabide bakarra aurkeztu beharko du Internet bidez, Osakidetzaren www.osanet.euskadi.net web-orrian, edo Erakundeko Intraneten dagoen eredua betez.

Aurreko paragrafoan adierazitako moduan eskabidea egiteko behar diren informatika-baliabideak jarriko ditu Osakidetzak, bere zerbitzu-erakundeen bitartez.

Eskabidea egiterakoan, profesionalak beretzat garrantzitsuak diren informazioak eman ditzake faktore edo item ezberdinetan ebaluatu ahal izateko. Horretarako, eskabidean dauden Ebaluaziorako Ekarpen Fitxak beteko ditu, eta Prestakuntza, Irakaskuntza/Ezagutza Hedatzea eta Ikerkuntza/Berrikuntzako merituak curriculum vitae aplikazio informatikoan erregistratuko.

Aurreko deialdietan Osakidetzak profesionalei curriculumeko merituak balioztatu badizkiete, alegatutako meritu berriak bakarrik erregistratu beharko dituzte profesional horiek, balioztatzeko behar den dokumentazio-egiaztagiriak aurkeztuz. Halaber, lehendik erregistratutako merituen dokumentazioa ere aurkez dezakete, egiaztapen-dokumentaziorik ez aurkezteagatik edota dokumentazio nahikoa ez aurkezteagatik Osakidetzak bere garaian baztertu arren.

Erregistroak baliozkotzeko egiaztagiriak jatorrizko dokumentuak izan beharko dira edo bestela, jatorrizkoaren fotokopia konpultsatuak. Fotokopian honako datuak adieraziko dira: data, izen-abizenak, NAN eta konpultsa egiten duen arduradunaren sinadura irakurgarria. Osakidetzak interesdunari eska diezaioke E.A.E.ko hizkuntza ez-ofizialetan aurkeztutako dokumentazioaren zinpeko itzulpena aurkeztea.

Ez da curriculumeko meritu bat ere zenbatuko, baldin eta erabiltzaileak Eskabideak aurkezteko epea amaitu ostean aplikazio informatikoan sartu edo aldatu baditu.

Halaber, eskabideak aurkezteko epea amaitu baino lehenago emandako dokumentu bidez amaitu gabe leudeken merituak ez dira zenbatuko.

Behin eskabidea eginda eta curriculumeko merituak erregistratuta, eskabidearen ordezkagiria Zerbitzu Erakundeko Pertsonalaren Departamentuan entregatu behar da eskabideak aurkezteko epean.

Eskatzaileek hilabeteko epea izango dute, Ebazpen hau EHAAn argitaratu eta hurrengo eguneko 14:00etatik aurrera, eskabidea eta merituen dokumentazioa bete eta aurkezteko, artikulu honetan ezarritakoaren arabera.

Osakidetzako Zuzendaritza Nagusiaren 1061/2009 Ebazpen bidez araututako Deialdian parte hartu zuten Lanbide Heziketako Profesional Ez Sanitarioek eta Sanitarioek 2012ko maiatzaren 21eko 14:00etatik ekainaren 8ko 14:00etara bitarteko epea izango dute eskabideak aurkezteko. Profesional horiei ez zitzaien IV. Maila aitortu ebaluazioan lortu ez zutelako eskatutako puntuazio-baldintzak.

Prozesuan onartua izateko, ezinbestekoa da dagokion eskabidea eta egiaztagiria behar den denboran eta moduan betetzea eta entregatzea, aurkezteko epearen barruan.

Ofizioz baztertuko dira profesionalak aurkeztutako curriculum-merituen eskabideak baldin eta eskatutako Lanbide Garapenaren Mailarako B Blokean eskatzen diren gutxieneko puntuetara ailegatzen ez badira.

Zerbitzu aktiboan ez baina beste egoeraren batean daudenek Osakidetzako Erakunde Zentralaren egoitzan aurkeztu beharko dituzte agiriak (Araba kalea, 45 zk., 01006 Vitoria-Gasteiz).

Eskabidean eta aurkezten diren agiri eta informazioetan datu faltsuak jarriz gero, zigortu egingo da eskabidea ezeztatuz; horretaz gain, legez dagozkion neurriak hartu daitezke.

Curriculumaren aplikazio informatikoan adierazitako helbidea izango da jakinerazpenetarako balioko duen bakarra, eta eskatzailearen erantzukizun esklusiboa izango da datu horiek gaizki eman badira edo edozein aldaketaren berri Osakidetzari eman ez badio.

Lizentzia-egoeran dauden edo lanpostua gordetzeko eskubidea duten baimena daukaten profesionalei, egoera horiek urtebete baino gehiago irauten dutenean, honako puntuazioa emango zaie A Blokeko eta C Blokeko agintariek ebaluatutako faktore eta item puntuazio moduan: bere lanbide-taldeko/kategoriako profesionalek bere Erakundean lortutako batez besteko puntuazioa, bere antzinatasun-taldearen barruan, egoera horretan dirauten bitartean. Aurreko hori ezinezkoa balitz, batez besteko hori kalkulatzeko 25 profesional edo gehiago ez dagoelako, erreferentziatzat beste batez besteko hau hartuko da: Osakidetzako profesionalek euren lanbide-taldean/kategorian eta antzinatasun-taldean lortutako batez bestekoa.

Zerbitzu berezietan edo sindikatu-ordezkapenetan lanaldiaren % 100ean liberatuta bi urte baino gehiago daramatzaten profesionalak Erakunde Zentraleko Batzordera atxikiko dira, eta eskatzen duten Maila lortzeko behar den gutxieneko puntuazioa emango zaie A eta C Blokeetako arduradunek ebaluatutako faktore eta itemen puntuazio moduan.

Ebaluazioa honela garatuko da: azaroaren 22ko 395/2005, otsailaren 27ko 35/2007 eta abenduaren 26ko 248/2007 Dekretuetako 6. artikuluaren (Profesionalen tipologia ebaluazioaren ondorioetarako), 7. artikuluaren (ebaluazioaren faktoreak) eta 8. artikuluaren arabera (ebaluazio-irizpideak) egingo da ebaluazioa. Dekretu horien bidez, Osakidetzan lan egiten duten pertsonal lizentziatu sanitarioen, diplomatu sanitarioen eta lanbide heziketako profesional ez-sanitarioen eta sanitarioen lanbide-garapena arautzen da.

Ebaluazio-prozesuan parte hartuko dute: Profesionalak berak, ebaluatuak lan egiten duen Arloko, Unitate edo Zerbitzuko arduradunak, eta zerbitzu-erakundeetan horretarako osatutako Ebaluazio-Batzordeak. Orokorrean, gainbegirale, zerbitzuburu/atalburu/unitateburu kargua duten arduradunak edo goragoko kargudunak izendatuko dira ebaluatzaile.

Ebaluatu beharreko profesionalak meritu hauen gaineko informazioa eman behar du: Prestakuntza/Ezagutza hedatzea eta Ikerkuntza/Berrikuntza, eta baita faktore edo item ezberdinetan ebaluatzeko garrantzitsuak iruditzen zaizkion informazioak ere, eskabidean dauden Ebaluaziorako Ekarpen Fitxak betez.

Arloko, Zerbitzuko edo Unitateko arduradunari dagokio A eta C Blokeetako faktoreak eta itemak ebaluatzea, jarduerarekin, gaitasunarekin eta lanbide-eremuarekin zerikusia duten faktoreak eta itemak ebaluatzea, erakundearekiko inplikazioarekin eta konpromisoarekin zerikusia dutenak barne, ebaluatu beharreko beste alderdi batzuen gaineko informazioa ere eska dakiokeela ahaztu gabe, ebaluazioaren emaitzak horretarako ezarritako aplikazioan erregistratuz eta Zerbitzu Erakundeko Ebaluazio Batzordeari aurkeztuz honek aztertu eta tratatu ditzan.

Alorreko, Zerbitzuko edo unitateko arduraduna ebaluatuaren lanbide-talde berekoa ez denean, eremu profesionalari dagokion ebaluazioa arduradun hierarkikoak edo funtzionalak egingo du.

Zerbitzu Erakundean ez badago ebaluatuaren lanbide-talde bereko arduradunik, ebaluatuaren titulazio bera edo goragokoa duen arduradun hierarkikoak egingo du ebaluazioa. Ebaluazio Batzordeak ebaluatuaren titulazio eta/edo espezialitate bereko aholkulari bat izendatu dezake.

Osakidetzako Erizaintzako Eskolako profesionalak, beren ezaugarri bereziak kontuan hartuta, Eskolako zuzendariak ebaluatuko ditu, eta Erakunde Zentraleko Batzordeari atxikita egongo dira.

Pertsonal ez-finkoarentzako ebaluazio-prozedura egokitu ahalko da pertsonal-mota horren berezitasunengatik, batez ere ebaluatzaileak izendatzeari eta ebaluazio-batzordeei dagokienez.

B eta C Blokeetako curriculumeko merituak ebaluatzeari dagokionez, kontuan hartuko dira aurreko sei edo zazpi urtetako merituak, aldez aurretik aitortu zaien mailari dagokion egonaldi-epearen arabera. Horiek guztiak eskabideak aurkezteko epea amaitu arte zenbatuko dira. I. maila aukeratuz gero, profesionalaren curriculum osoa hartuko da kontuan.

Zerbitzu Erakundeko Ebaluazio Batzordeak prozesu osoan sortutako informazio guztia, Arloko, Zerbitzuko edo Unitateko arduradunek egindako ebaluazioak, ebaluatutako profesionalek betetako ekarpen-fitxak eta curriculumeko baremo-merituak jaso eta aztertuko ditu, eta hala badagokio, ebaluazioaren emaitzak onartuko ditu.

Atal ezberdinetan lortutako emaitzak ikusita, Ebaluazio Batzordeak uste badu profesionalari buruzko informazio gehiago behar dela, ebaluatuaren ebaluazio osagarri bat egitea eska diezaieke Arloko, Zerbitzuko edo Unitateko profesionalei, edo hala badagokio, beste Zerbitzu Erakunde bateko espezialitate bereko profesionalei.

Ebaluazio-Batzordeak, bere jarduera amaitutakoan, egiaztatutako mailen behin-behineko zerrenda prestatu eta onartuko du, eta Osakidetzako Zuzendaritza Nagusira igorriko.

Beti, dagokion ebaluazioa gainditu behar da, bloke bakoitzean eta azaroaren 22ko 395/2005, otsailaren 27ko 35/2007 eta abenduaren 26ko 248/2007 Dekretuetako 8. artikuluan ezarritako gutxieneko puntuazio lortuz, dagokion maila esleitzeko.

395/2005 Dekretuan araututako profesionalei IV. Maila esleitzeko, baldintza hau ezartzen da: B Blokean eskatzen diren puntuetatik (57 puntu), gutxienez % 10 lortzea «Irakaskuntza eta ezagutza hedatzea» atalean eta/edo «Ikerkuntza-Berrikuntza eta beste meritu batzuk» izeneko atalean.

B1 taldeko (Diplomatu sanitarioak), A2 taldeko (Goi mailako teknikariak) eta B2 taldeko (erdi-mailako teknikariak) profesionalei IV. Maila esleitzeko, baldintza hau jarri daiteke hurrengo Lanbide Garapeneko Deialditik aurrera: B blokean eskatzen diren puntuetatik (57 puntu) gutxienez % 5 lortzea «Irakaskuntza eta ezagutzaren hedapena» atalean eta/edo «Ikerkuntza-Berrikuntza eta beste meritu batzuk» izeneko atalean.

Profesionalak ebaluatzeko ardura duten organoei azaroaren 26ko 30/1992 Legearen 28. eta 29. artikuluak aplikatuko zaizkie (Herri Administrazioen Araubide Juridiko eta Administrazio Prozedura Erkidearen Legea).

1. Mailak esleitzeko behin-behineko ebazpena.

   Ebaluazio batzordeak, egiaztatutako mailen behin-behineko zerrenda onartutakoan, Osakidetzako Zuzendaritza Nagusira bidaliko du.

   Erakundeko batzordeak txostena bidali ondoren, Osakidetzako Giza Baliabideetako Zuzendaritzak Euskal Herriko Agintaritzaren Aldizkarian argitaratzeko aginduko du ebazpen baten bidez. Horren aurka, gora jotzeko errekurtsoa aurkeztu ahalko zaio Osakidetzako Zuzendaritza Nagusiari hilabeteko epean, ebazpena argitaratu eta biharamunetik aurrera. Hala agintzen da azaroaren 26ko 30/1992 Legearen 114. artikuluan eta hurrengoetan (30/1992 Legea, Herri Administrazioen Araubide Juridiko eta Administrazio Prozedura Erkidearena).

2. Mailak esleitzeko behin betiko ebazpena.

   Jarritako errekurtsoak Zuzendaritza Nagusiak erabakiko ditu, eta lortutako mailak behin betiko esleituko ditu ebazpen bidez. Ebazpen hori EHAAn argitaratuko da.

   Maila-esleipenaren behin betiko ebazpenean Maila aitortzen zaien profesionalen zerrenda eta baztertutako profesionalena onartuko da, eta administrazio-bidea agortuko duen Ebazpen horren aurkako jarritako gora jotzeko errekurtsoak onartu edo ezetsiko dira.

Azaroaren 22ko 395/2005 Dekretuan Lanbide Garapenaren Maila bakoitzeko zenbatekoak ezartzen dira Lizentziatu Sanitarioentzat, eta ekainaren 3ko 106/2008 Dekretuan gainerako lanbide-taldeentzat.

Maila aitortzeko eskabidea egiteko hilabeteko epea duten profesionalentzat, ebazpen hau EHAAn argitaratu eta hurrengo eguneko 14:00etatik aurrera, Mailari esleitutako ordainketak ebazpen hau sinatu eta hurrengo urteko urtarrilaren 1etik aurrera egingo dira, azaroaren 22ko 395/2005, otsailaren 27ko 35/2007 eta abenduaren 26ko 248/2007 Dekretuen arabera.

Maila aitortzeko eskabidea egiteko 2012ko maiatzaren 21etik ekainaren 8ra arteko epea duten profesionalentzat, Mailari esleitutako ordainketak eskabidea aurkezteko epea amaitu eta hurrengo hilabeteko 1ean egingo dira.

Pertsonal ez-finkoak bere lanbide taldearen lanbide garapeneko mailari dagozkion zenbatekoak kobratuko ditu, lanbide talde horretan egindako zerbitzuetan aitortutako denboraldietakoak.

Goragoko lanbide-taldeko kategoria batean lanpostu finkoa lortzen dutenek, aurretik lanbide garapeneko maila bat aitortuta badute, ordainsari-osagarri bat izango dute, garapen-maila horri dagokion zenbatekoaren balio berekoa, harik eta kategoria berrian aurrekoaren zenbatekoa gainditzen duen garapen-maila bat aitortu arte.

Aitortutako azken mailari dagokion zenbatekoa bakarrik jaso daiteke, eta aldi berean ezingo da inolaz ere jaso garapen-osagarria kategoria profesional batean baino gehiagotan.