Ongi etorri Legegunea atarira

Dekretu honen bitartez, batetik, Industria, Merkataritza eta Turismo Sailaren Estatistika Organo Berezia sortzen da, eta, bestetik, organo horren antolamendua eta funtzionamendua ezartzen dira, ekainaren 22ko 180/1993 Dekretuko preskripzioekin bat etorriaz, izan ere, dekretu horretan arautu egiten baitira sailetako estatistika organo bereziak.

Industria, Merkataritza eta Turismo Sailaren Estatistika Organo Berezia kide bakarreko organoa da, eta sail horretako Plangintza eta Estrategia zuzendariaren menpe dago.

1. – Industria, Merkataritza eta Turismo Sailaren Estatistika Organo Berezia, bere eskumenei dagokienez, I motako legez eratzen da. Eta horren ondorioz, 180/1993 Dekretuak era horretako estatistika organo bereziei esleitzen dizkien eskumenak eta ahalmenak izango ditu, eta bereziki honako hauek:

   1. Saileko Estatistika Plana prestatzea, hain justu ere Euskal Estatistika Planaren Proiektuaren oinarritzat balioko duena.

   2. Euskal Estatistika Plana eta Urteko Estatistika Programak prestatzen lankidetzan jardutea Euskal Estatistika Batzordea / Comisión Vasca de Estadística-rekin.

   3. Urteko Estatistika Programen barruko estatistikak edo horien faseak prestatzea, programa horietan zehaztu bezala.

   4. Euskal Estatistika Plan eta Urteko Estatistika Programetan sartzen ez diren estatistika propioak prestatzea, 4/1986 Legeko 8.1 artikuluan aurreikusitako zehaztapenekin bat etorriaz.

   5. Artikulu honetako c) eta d) idatz-zatietatik eratorritako estatistika-funtzioak direla-eta beste erakunde batzuekin erlazionatzea, 4/1986 Legeko 29. artikuluko c) eta d) idatz-zatietan ezarritakoa errespetatuaz betiere.

   6. Bere eskumenpeko estatistikak egiteko informazioa lortzea, betiere 4/1986 Legeko 9. eta 16. artikuluetan jasotako zehaztapenekin bat etorriaz.

   7. Artikulu honetako d) idatz-zatian aipatutako estatistiken emaitzak zabaldu eta argitaratzea, eta, halaber, Urteko Estatistika Programetan zehazten direnak, betiere, aldez aurretik haien edukiak Euskal Estatistika Erakundea / Instituto Vasco de Estadísticari jakinarazita.

   8. Bere sektorearen eremuko fitxategi-direktorio estatistikoak prestatzen eta gaurkotzen parte hartzea, betiere 4/1986 Legeko 29. i) artikuluan aurreikusitakoarekin bat etorriaz.

   9. Industria, Merkataritza eta Turismo Sailak interesgarritzat jotzen dituen proiektuak burutzea, batez ere sektorearen eta azpisektoreen arloetako analisiak, azterlanak eta zerbitzuak, betiere, 180/1993 Dekretuko 7.2 artikuluan ezarritako markoaren barruan.

2. – Industria, Merkataritza eta Turismo Sailaren Estatistika Organo Bereziak ondoko arloetan baliatuko ditu bere eskumenak: aipatu sailaren estatistika premietan, eta, Euskal Estatistika Erakundea aparte delarik, sail horri atxikita dauden ente instituzionalen premietan, nahiz eta estatistika-datuetan edo administrazio-datuetan oinarriturik prestatu behar estatistikak.

3. – Industria, Merkataritza eta Turismo Sailaren Estatistika Organo Bereziak errespetatu egin beharko ditu ondoko eskumenak: estatistikek eragiten den gaiei dagokienez, sail horretako organo eta instantziei legez esleitutakoak. Organo eta instantzia horiek organo hark eskatutako informazio eman beharko diote, baldin eta beharrezko badu informazioa hori bere eskumenak baliatzeko.

180/1993 Dekretuko 4. artikuluan aurreikusitako Estatistika Organo Berezien Erregistroan inskribatu ostean, Euskal Autonomia Erkidego Estatistikari doakionez, Industria, Merkataritza eta Turismo Sailaren Estatistika Organo Bereziak gauzatu egingo du bere jarduera, estatistikari buruzko legeria errespetatua, hain justu ere, beste ente eta organo batzuekin izango dituen harremanetan, barne direla aipatu sailari atxikitako eta sailari dagozkionekin izandakoak ere.

Vitoria-Gasteizen, 2006ko urriaren 3an.

Lehendakaria,

JUAN JOSÉ IBARRETXE MARKUARTU.

Industria, Merkataritza eta Turismo sailburua,

ANA AGUIRRE ZURUTUZA.