Ongi etorri Legegunea atarira

Klima-aldaketaren Euskal Bulegoa sortu da, Ingurumen eta Lurralde Antolamendu Sailari atxikitako kide anitzeko organo gisa, eta Dekretu honetan arautu da antolamendua eta funtzionamendua.

Klima-aldaketaren Euskal Bulegoak ondoko funtzio hauek beteko ditu:

Klima-aldaketara egokitzeko politiketan eta klima-aldaketari loturik Eusko Jaurlaritzak gauzatzen dituen ekintza guztietan koordinazioa sustatu eta segimendua egitea. 2008-2012 aldirako Klima-aldaketari Aurre egiteko Euskal Planean ezarritako jarraibideak hartuko dira aintzat, eta kontuan izango da beti urrakortasunaren, horren arriskuaren eta hartu beharreko egokitzapen-neurrien inguruko ezagutza.

Klima-aldaketari aurre egitearen arloan eskumenak dituzten organo guztiei helaraziko zaizkie ekintza-proposamenak.

Klima-aldaketari Aurre egiteko Euskal Plana garatzean Eusko Jaurlaritzako sailek landutako araudien aurreproiektuak, planak eta programak ezagutu eta horren inguruko jakinarazpenak egitea.

Eusko Jaurlaritzako sailen artean zeharkako ekintzak bultzatzea, klima-aldaketara egokitzea errazteko eta berotegi-efektua eragiten duten gasen isuriak murrizteko.

1. Klima-aldaketaren Euskal Bulegoa honela eratuko da:

   Presidentea: ingurumenaren arloan eskumena duen Saileko sailburu titularra.

   Presidenteordea: ingurumenaren arloan eskumena duen sailburuordea.

   Idazkaria: Ihobe SA Ingurumenaren Kudeaketarako Sozietate Publikoko zuzendari nagusia.

   Kideak:

   Uraren Euskal Agentziaren ardura duen sailburua.

   Sailburuorde mailako pertsona bat, 5 arlo hauetako bakoitzean eskumena duten sailetakoa: industria; etxebizitza; unibertsitateak eta ikerketa; garraioa eta nekazaritza.

2. Aipatutako pertsonak izendatzea pertsona horiek ordezkatuko dituzten sailetako titularrei dagokie, eta horrekin batera, ordezko gisa, sail bereko beste pertsona batzuk izendatuko dira, eta goi-kargudunak izango dira.

3. Salbuespenetan, presidenteak gonbidatuta, organo honen bileretara deitu ahal izango zaie honako hauei, horregatik organoko kide izango ez diren arren: Bulegoan ordezkaritzarik ez duten Eusko Jaurlaritzako beste sailetako ordezkariei, beste administrazio publiko batzuetako ordezkariei edo arloan adituak diren pertsonei. Jorratuko diren gaiak hobeto aztertzeko beharrezkoa edo komenigarria denean egingo da hori.

4. Ingurumen eta Lurralde Antolamendu Sailak eskainiko dio laguntza teknikoa Klima-aldaketaren Euskal Bulegoari, Ihobe SA sozietatearen bidez; gaiak prestatzea izango da sozietatearen lana, eta, hala dagokionean, Bulegoan aztertuko diren txosten-proposamenak egitea. Helburu horrekin, zerikusia duten sailetako teknikarien lankidetzaz baliatu ahal izango dira, eta beharrezkoa denean, berariazko lantaldeak eratuko dira, Bulegoak zuzen jardutea ziurtatzeko behar diren laneko agiri teknikoak prestatu, analizatu eta aztertzeko.

1. Klima-aldaketaren Euskal Bulegoa ohiko bilkuratan elkartuko da, gutxienez urtean bitan. Edozein unetan, Bulegoak bilera bat egin ahal izango du, presidenteak erabakita edo kideen erdiek eskatuta.

2. Bileretarako deia egitea presidentearen zeregina da. Idazkariak egingo die deia Bulegoko kide guztiei, eta gai-zerrenda bidaliko die.

3. Bulegoaren bilerak egiteko, kideen gehiengo osoa bertaratu beharko da. Quorum hori lortzen ez bada, bigarren deialdian egin ahal izango da bilera, betiere lehen deialdirako ezarritako egunean egiten bada; gutxienez, Bulegoko kideen heren bat bertaratu beharko da.

4. Klima-aldaketaren Euskal Bulegoak gehiengo soilez hartuko ditu erabakiak, eta presidenteak izango du lehentasun-botoa, berdinketa gertatzen denean erabakia hartzeko.