Ongi etorri Legegunea atarira

1. atala.– Xedea.

   Agindu honek fondo ekonomikoak aplikatzerakoan erabili beharreko irizpideak ezartzen ditu. Fondo horiek Euskal Autonomia Erkidegoko Administrazio Orokor eta Instituzionalak Herri Lanetarako duen aurrekontuetako erreserbatik hartu dira, beti ere, Euskal Kultur Ondarearen Legearen 106. atalari jarraituz.

2. atala.– Irizpideak.

   Aurreko atalean aipatutako aurrekontuen erreserbatik hartutako baliabide ekonomiko horiek edo diru-kopuru hori erabiltzerakoan irizpide hauek erabiliko dira, hurrengo lehentasun-hurrenkerari jarraituz:

   1. Lehenik, sailkatutako monumentu-multzoetarako erabiliko da, batez ere, monumentu horiek berreskuratzeko edo, monumentuei kalte egiten dieten osagaiak kentzeko, ingurua babesteko eta ondasunen kotizazioa mantentzeko behar diren proiektuak eta ekimenak bultzatzeko, beti ere, erabili beharreko babes-araudiaren arabera.

   2. Bigarrenik, hiri-dokumentuak eta beren garapen-tresnak sortzeko, errebisatzeko edo aldatzeko erabiliko dira, burutzeko proiektuak ere barnean direla, beti ere, sailkatuta, zerrendan jasota edo balizko arkeologia guneetan dauden kultura-ondasun horietan eragin ona badute. Atal honetan sar daitezke honako hauek ere: hirigintza-plana egiteko beharrezko diren dokumentu guztiak, beren planimetria-osagarriak eta kultura-ondareari buruzko informazio-bilketa eta prestaketa, beti ere, aipatutako hirigintza-plana prestatzeko, errebisatzeko edo aldarazteko bada.

   3. Hirugarrenik, industriari edo baserri-munduari lotutako kultura-ondarea, edo horrela sailkatua eta zerrendan jasota dagoena babesteko erabiliko da. Kasu horretan, aipatutako kultura eta industria-ondare hori berreskuratu eta erabiltzeko proiektuei emango zaie lehentasuna.

   4. Laugarrenik, Euskal Kultura Ondarea hedatzeko erabiliko da, batez ere, aipatutako kultura-ondarea babestu beharra dagoela-eta gizartean kontzientzia sustraitu eta zabaltzeko ekimenak bultzatzeko.

   5. Bosgarrenik, sailkaturiko eta zerrendan jasotako ondasunak eta beren inguruak desjabetzeko gastuei aurre egiteko, batez ere, arkeologia-ondarearen kasuetan.

   6. Eta azkenik, orain arte aipatutako helburuez gain, Euskal Kultur Ondarearen Legean jasotako beste edozein helburu betetzeko.

3. atala.– Irizpideak nola aplikatu.

1. – Irizpideak aurreko atalean ikusitako lehentasun-hurrenkeraren arabera aplikatuko dira. Dena den, fondoak Kultura Sailari transferitzen zaizkion kasuetan, diru horiek Sailak berak bana ditzake ezarritako lehentasun-hurrenkerari jarraituz, eta, beti ere, hurrenkera horrek berak ezarritako portzentaien arabera, alegia, lehentasuna duenari gehiago eta hurrengoei gutxiago emanez, hurrenez hurren.

2. – Jasotako diru hori herri-lanen inguruan bertan erabili behar denean, aurreko atalean aipatutako irizpide berberak hartuko dira kontuan, baina, aldi berean, herri-lanen inguruan berariaz daudenak ere aplikatuko dira, beti ere, Eusko Jaurlaritzako uztailaren 28ko 204/1998 Dekretuaren 4. atalean jasotakoari jarraituz.

Agindu hau Euskal Herriko Agintaritzaren Aldizkarian argitaratu eta hurrengo egunetik aurrera sartuko da indarrean.

Vitoria-Gasteiz, 1999ko otsailaren 19a.

Kultura sailburua,

M.ª CARMEN GARMENDIA LASA.