Ongi etorri Legegunea atarira

– Agindu honen helburua honako hau da: Euskadiko Ekoizpen Integratuko Operadoreen Erregistroaren antolakuntza- eta jardun-arauak ematea eta sistemari bildutako operadoreen inskripzio-prozedura arautzea. Erregistroa, alegia, Ekoizpen integratuari eta hura nekazaritzako elikagaietan adierazteari buruzko otsailaren 13ko 31/2001 Dekretuaren bidez sortu zen.

– Euskadiko Ekoizpen Integratuko Operadoreen Erregistroaren helburua honako hau da: Euskal Autonomia Erkidegoan ekoizpen integratura biltzen diren nekazaritza-ustiategi eta nekazaritzako elikagaien industriei buruzko beharrezkoa den informazioa modu iraunkorrean, integratuan eta eguneratuan eskura izatea, administrazioak nekazaritza eta industriaren arloan dituen eskumenak erabiltzeari begira.

– Agindu honetan jasotako arauak Euskal Autonomia Erkidegoan aritzen diren eta otsailaren 13ko 31/2001 Dekretuaren 4. artikuluan zehaztutako baldintzak betetzen dituzten operadore guztiei ezarriko zaizkie.

– Aipatutako artikuluan ezarritakoa betetzeko, entitate batek jarraitu eta egiaztatu beharko ditu jarduerak. Jardueren kontrolean sortutako gastuak operadorearen kontura izango dira.

– Euskadiko Ekoizpen Integratuko Operadoreen Erregistroa bakarra da Euskal Autonomia Erkidego osorako eta Eusko Jaurlaritzako Nekazaritza eta Arrantza Sailari atxiki zaio. Izan ere sail hori da erregistroaren kudeaketaren arduraduna Nekazaritzako Elikagai Politika eta Industriarako Zuzendaritzaren bitartez.

– Erregistroa, informatika-prozeduren bidez kudeatzen da eta bi liburutan egituratzen da:

1. Ekoizleen liburuan.

2. Maneatzaileen edo eta prestatzaileen liburuan.

– Liburu bakoitzean agertu behar diren datuak, gutxienez, honako hauek izango dira:

1. Ekoizleen liburuan:

   • Nekazaritza-ustiategiaren titularraren izena edo baltzu-izena, eta helbidea.

   • Zein ekoizle-talderi lotzen zaion. Horrela bidezkoa izango da baliabide teknikoak eskura izatea aholkuak emateko, zuzentzeko eta eskatzailearen nekazaritza-ustiategian ekoizpen–arauak betetzen diren kontrolatzeko, bai eta ardura duen teknikariaren datuak eta titulazioa; edo, hala badagokio, ekoizle banakoaren kualifikazioaren egiaztapena.

   • Lursailaren edo lursailen katastro-erreferentzia: udalerria, parajea, poligonoa, lursaila.

   • Ustiategiko ekoizpen integratua: labore-espezieak eta barietateak, abere-espeziea, ekoizpen-orientabidea, abere-kopurua.

   • Jarraipen eta egiaztapenerako entitatea.

2. Maneatzaileen edo eta prestatzaileen liburuan:

   • Nekazaritza-ustiategiaren edo eta nekazaritzako elikagaien enpresaren titularraren izena eta helbidea.

   • Maneatzen, prestatzen, etiketatzen, biltzen edo merkaturatzen dituen nekazaritza-elikagaiak, bai ohikoak bai ekoizpen integratutik datozenak. Bi kasuotan honakook adieraziko dira:

   • Kopurua, guztira.

   • Erabilitako markak.

   • Neurria.

   • Ekoizpen integratuko nekazaritzako elikagaietarako aurreikusitako destinoa.

   • Jarduera zehaztea eta honako hauek adieraztea: instalazio-motak, kokapena eta produktuek jasaten duten prozesu-motak.

   • Zein Maneatzaile-talderi edo eta prestatzaile-talderi lotzen zaion. Horrela bidezkoa izango da baliabide teknikoak eskura izatea aholkuak emateko, zuzentzeko eta eskatzailearen nekazaritzako elikagaien industrian ekoizpen–arauak betetzen diren kontrolatzeko, bai eta ardura duen teknikariaren datuak eta titulazioa; edo, hala badagokio, aholkuak emateaz, zuzentzeaz eta nekazaritzako elikagaien enpresan ezargarriak diren arauak betetzen diren kontrolatzeaz ardura duen teknikariaren izena eta titulazioa.

   • Jarraipen eta egiaztapenerako entitatea.

– Ekoizpen integratuko sistemara bildutako operadore guztiek horretarako sortutako erregistroan izena eman beharko dute eta inskripzio horretan dauden datuak eguneratu beharko dituzte horien egiazkotasunaren erantzule izango direla, otsailaren 13ko 31/2001 Dekretuaren 4. artikuluan aipatutako baldintzak bete ondoren.

– Ekoizpen Integratuko Erregistroan izena ematea ezinbesteko baldintza da ekoizpen-mota horri lotutako edozein sustapen-neurri edo laguntzara biltzeko, bai eta Nekazaritza eta Arrantza Sailaren Nekazaritzako Elikagai Politika eta Industriarako Zuzendaritzak ematen duen egiaztagiria lortzeko ere.

– Erregistroan izena emateko epea urte osoan zehar egongo da irekita.

– Nolanahi ere, eta ekoizpen integratuko arau teknikoak betetzen diren kontrolatzeari eta egiaztatzeari begira, bi salbuespen aurreikusi dira. Kasu horietan erregistroko inskripzioak eginkortasuna izan dezan honako epeok bete beharko dira:

1. Urteroko laborantza-ustiategien kasuan, bai estentsiboetan bai intentsiboetan, inskripzioa laboreak ezarri aurretik egin beharko da.

2. Hainbat urtetarako belarkien edo eta zurezkoen laborantzan, inskripzioa urteko ekoizpen-zikloa hasi aurretik egin beharko da.

   Kasu horietan, inskripzioa epetik kanpo egiten bada, prozesuaren kontrola eta egiaztapena ez da egingo datorren nekazaritza-kanpaina arte.

– Euskadiko Ekoizpen Integratuko Operadoreen Erregistroan izena emateko, operadoreek edo euren legezko ordezkariek eskabide normalizatuaren eredua bete eta dokumentatu beharko dute. Eredu hori erregistroko arduradunak emango du.

– Interesdunak edo bere legezko ordezkariak Nekazaritza eta Arrantza Sailaren Nekazaritzako Elikagai Politika eta Industriarako Zuzendaritzari aurkeztuko dio eskabidea (Donostia 1, Vitoria-Gasteiz), bai zuzenean bai Herri Administrazio Araubide Juridikoaren eta Administrazio Prozedura Erkidearen Legearen 38.4. artikuluan aurreikusitako bideen bitartez.

– Aurretik ezarritakoari kalterik egin gabe, izena emateko eskabideak ekoizleen taldeen bitartez izapidetu ahal izango dira. Ekoizleen taldeek batera bidaliko dituzte bere aholkularitza eta zuzendaritzapeko operadoreen eskariak.

– Eskabideak edo eta aurkeztutako dokumentazioak eskakizun guztiak betetzen ez badituzte edo nahikoak ez badira, interesdunari akatsa zuzentzeko edo behar diren dokumentuak aurkezteko eskatuko zaio, hamar eguneko epean, gehienez. Halaber, horrela egiten ez badu, eskabidea atzera bota duela ulertzen dela jakinaraziko zaio, Nekazaritzako Elikagai Politika eta Industriarako zuzendariak ebazpena eman ondoren Herri Administrazio Araubide Juridikoaren eta Administrazio Prozedura Erkidearen Legearen 42. artikuluan zehaztutakoaren arabera.

– Nekazaritzako Elikagai Politika eta Industriarako Zuzendaritzak egin ditzakeen ikuskapenei kalterik egin gabe, eskabidea aurkeztu eta hurrengo sei hilabeteetan jarraipen eta egiaztapen entitateak behar beste ikuskapen edo egiaztapen egingo ditu eskaria egin duen nekazaritza-ustiategian edo nekazaritzako elikagaien industrian, aurkeztutako datuak egiazkoak diren egiaztatzeari begira eta Nekazaritzako Elikagai Politika eta Industriarako Zuzendaritzari inskripzioa onartzekoa den jakinarazteko.

– Nekazaritzako Elikagai Politika eta Industriarako zuzendariak, inskripzio-eskabidea aurkeztu eta sei hilabeteko epean, gehienez, eta aurretik egindako kontrolak oinarritzat harturik, ebazpena emango du erregistroan inskripzioa onartzeko edo ukatzeko.

Epe hori amaitutakoan berariazko ebazpena eman eta jakinarazi ez bada, interesatuek euren eskabideak onartu direla ulertu ahal izango dute Herri Administrazio Araubide Juridikoaren eta Administrazio Prozedura Erkidearen Legearen 43. artikuluan zehaztutakoaren arabera.

– Ebazpenaren aurka, edo, ebazteko epea berariazko ebazpena eman gabe amaitzen bada, interesatuek gorako errekurtsoa jarri ahal izango diote Nekazaritza eta Landa Garapeneko sailburuordeari hilabeteko epean ebazpen horren jakinarazpena jaso eta hurrengo egunetik kontatzen hasita, edo hiru hilabeteko epean administrazioaren ixiltasunak indarra hartu eta hurrengo egunetik kontatzen hasita, Herri Administrazio Araubide Juridikoaren eta Administrazio Prozedura Erkidearen Legearen 114. eta 115. artikuluetan zehaztutakoarekin bat etorriz.

– Ekoizpen Integratuko Erregistroan izena ematea onartzen duen ebazpena, jarduera zein den, Nekazaritzako Elikagaien Industrien Erregistroaren edo eta Nekazaritza Ustiategien Erregistroaren arduradunei jakinaraziko zaie, erregistro horien artean koordinazioa eta informazio-homogeneotasuna egon dadin.

– Inskripzioa egin eta gero, Nekazaritzako Elikagai Politika eta Industriarako zuzendariak izena emanda dagoela egiaztatzen duen agiri bat emango dio operadoreari. Ziurtagiri horretan honako datu hauek jaso beharko dira, gutxienez:

• Norberaren datuak.

• Nekazaritza-ustiategi edo nekazaritzako elikagaien industriaren datuak.

• Erregistro-zenbakia.

• Izena eman duen operadoreak bete beharreko konpromisoak ekoizpen integratuko sistemari dagokionez.

– Nekazaritza arloan eskumena duten administrazioek inskripzio-ziurtagiri hori eskatu ahal izango dute nekazaritza-ustiapen edo nekazaritzako elikagaien industriarekin lotutako kudeaketak eta tramitazioak egiteko.

– Datuak egunera egon daitezen, erregistroan izena emanda dauden operadoreek erregistroko datuen aldaketa guztien berri eman beharko diete erregistroaren arduradunari.

– Urteroko laborantza-ustiapenen kasuan, bai estentsiboetan bai intentsiboetan, aldaketa laboreak ezarri aurretik jakinaraziko da; eta hainbat urtetarako belarkien edo eta zurezko laborantzen kasuan, urteko ekoizpen-zikloa hasi baino lehen.

– Erregistroaren arduradunak Nekazaritzako Elikagai Politika eta Industriarako zuzendariari jakinaraziko dio eta honek erregistro-datuak aldatzeko ebazpena emango du. Ebazpen hori interesatuari eta Nekazaritzako Elikagaien Industrien Erregistroaren edo eta Nekazaritza Ustiategien Erregistroaren arduradunei, eta horren aurka gorako errekurtsoa aurkeztu ahal izango da agindu honen 6. artikuluan zehaztutakoaren arabera.

– Aldaketa egin eta gero, Nekazaritzako Elikagai Politika eta Industriarako zuzendariak inskripzio-ziurtagiria berrituko du.

– Euskadiko Ekoizpen Integratuko Operadoreen Erregistroko inskripzioa ofizioz ezereztu ahal izango da interesadunari entzun eta gero, edo interesadunak berak eskatuta. Nolanahi ere, bi kasuetan ezereztea arrazoitu egin beharko da.

– Nekazaritzako Elikagai Politika eta Industriarako zuzendariak dagokion ezerezte-ebazpena emango du. Ebazpen hori interesatuari eta Nekazaritzako Elikagaien Industrien Erregistroaren edo eta Nekazaritza Ustiategien Erregistroaren arduradunei jakinaraziko zaie, eta horren aurka gorako errekurtsoa aurkeztu ahal izango da agindu honen 6. artikuluan zehaztutakoaren arabera.