Ongi etorri Legegunea atarira

Baimenak, 1. paragrafoan adierazitako salbuespenarekin, behar bezala justifikatutako ondoko arrazoiengatik baino ez dira emango:

1. – Norberaren beharretarako baimena.

2. – Seme edo alaba baten jaiotza, harrera edo adopzioagatiko baimena.

3. – Senitarteko baten heriotza, istripu edo gaixotasun larriagatiko baimena.

4. – Bizilekuz aldatzeagatiko baimena.

5. – Funtzio sindikalak, prestakuntza sindikalekoak edo langileak ordezkatzekoak egiteko baimena.

6. – Zentro ofizialetan azken azterketak, eta gainerako behin betiko gaitasun eta ebaluazio probak egiteko baimena.

7. – Kontsulta, tratamendu eta azterketa medikoak egiteko baimena.

8. – Seme edo alaba baten erditze, adopzio edo harreragatiko, eta hamar hilabetetik beherako seme edo alaba baten edoskitzeagatiko baimena.

9. – Nahitaezko betebehar publiko edo pertsonal bat egiteko ezinbestekoa den denborarako baimena.

10. – Lanaldia murrizteko baimena:

1. – Legezko zaintzari lotutako arrazoien ondorioz.

2. – Aurretiko erretiroaren ondorioz.

3. – Funtzionarioak osatzeko duen beharraren ondorioz.

4. – Norberaren interesagatik.

11. – Hautapenezko karguari dagozkion funtzioak betetzeko baimena.

12. – Gaixotasun kronikoak edo mugitzeko arazoak dituzten senitartekoak zaintzeko baimena.

1. – Norberaren beharretarako baimena:

   Urtearen barruan, norberaren beharretarako gehienez bederatzi baimen-egun hartzeko eskubidea izango da (justifikatu gabe). Baimenak behar adinako aurretiaz eskatu beharko dira, betiere zerbitzuaren beharrak errespetatuta, eta Bulego Judizialeko arduradunaren, fiskalburuaren edo Auzitegiko Medikuntzako Euskal Erakundearen zuzendariaren edo zuzendariordearen aldeko txostena lortu ondoren. Honako irizpide hauei jarraituko zaie:

   • Egun horiek ezin izango dira, inola ere, urteko opor ordainduekin metatu.

   • Debeku horri jarraiki, oporraldia hasten edo amaitzen denetik baimen hau hartu arte egun natural bat beharko da gutxienez.

   • Langileak bere beharretarako eskubidez hartu ahal izango dituen baimen-egunen urteko kopurua urtearen barruan lan egindako egunen proportziozkoa izango da.

2. – Seme edo alaba baten jaiotza, harrera edo adopzioagatiko baimena:

   Seme edo alaba baten jaiotza, harrera edo adopzioagatik, ezkontideak edo izatezko bikotekideak 5 laneguneko lizentzia baterako eskubidea izango du. Erditzea dela eta, amaren edo umearen koadro klinikoan arazoren bat izanez gero (zesarea eta abar), edota erditzea ezkontidearen edo izatezko bikotekidearen ohiko bizilekutik 150 km baino urrutiago gertatuz gero, ezkontideak bi lanegun gehiago izango lituzke, kasu bietan.

   • Erditze anizkoitzaren kasuan, zirkunstantzia hori ez da arrazoi izango iraupen handiagoko baimen bat emateko.

   • Eman beharreko baimenaren egunak erabakitzeko erreferentziazko herriak ezkontidea edo izatezko bikotekidea bizi den herria eta gertaeraren herria izango dira.

3. – Senitarteko baten heriotza, istripu edo gaixotasun larriagatiko baimena:

   Kontzeptu honen zioz funtzionarioak eskubidegai duen baimenak hurrengo iraunaldiok dauzka:

1. – 5 lanegun ezkontidearen, izatezko bikotekidearen edo seme-alaben egiaztatutako gaixotasun larriagatik edo heriotzagatik.

2. – 3 lanegun bigarren mailara bitarteko odolkidetasun edo kidetasuneko senitartekoen heriotzagatik (edo beste maila urrunago batera bitartekoenagatik, elkarrekin biziz gero).

3. – Bi lanegun bigarren mailara bitarteko odolkidetasun edo kidetasuneko senitartekoen gaixotasun larriagatik (edo beste maila urrunago batera bitartekoenagatik, elkarrekin biziz gero). Kasu horretan, iraupen bereko bigarren baimena jasotzeko eskubidea izango dute langileek, lehen baimena amaitu eta 30 egun igaro ondoren, baina ez da egun gehiago izango ohiko bizilekuarekiko distantziagatik.

4. – Aipaturiko baimenaldiak, egitate sortzaileak funtzionarioaren ohiko bizilekutik ehun eta berrogeita hamar kilometro baino urrutiago gertatzekotan, beste bi egunez luzatuko dira.

5. – Hainbat senitartekoren heriotzaren edo gaixotasun larriaren kasuan, zirkunstantzia hori ez da arrazoi izango iraupen handiagoko baimen bat emateko.

6. – Eman beharreko baimenaren egunak erabakitzeko erreferentziazko herriak funtzionarioa bizi den herria eta gertaeraren herria izango dira.

4. – Bizilekuz aldatzeagatiko baimena:

   Funtzionarioak, ohiko etxebizitza aldatzeagatik, 2 laneguneko lizentziarako eskubidea izango du, betiere behar bezala frogatzen badu.

5. – Funtzio sindikalak, prestakuntza sindikalekoak edo langileak ordezkatzekoak egiteko baimena:

   Funtzio sindikalak, prestakuntza sindikalekoak edo langileak ordezkatzekoak dituztenek dagokion baimena hartzeko eskubidea izango dute, indarrean dagoen araudiak ezarritako zirkunstantzia, epe, baldintza eta preskripzioei, eta Euskal Autonomia Erkidegoko Administrazioko eskubide sindikalei eta jarduera sindikalari buruzko Esparru Akordioan jasotako estipulazioei jarraiki. Baimen sindikalak baliogabetu ahal izango dira helburua ez betetzeagatik, Administrazioarenaz bestelako eremuetan jarduera sindikalak egiteagatik, edo legezko bateraezintasuna dakartenak egiteagatik, hori guztia ezarritako itunei jarraiki, eta eraginpean hartutako sindikatuei aldez aurretik kontsulta egin ondoren. Era berean, sindikatuak edo interesatuak berak eskatuta, emandako baimenak kendu ahal izango dira.

6. – Zentro ofizialetan azken azterketak eta gainerako behin betiko gaitasun eta ebaluazio probak egiteko baimena:

   Zentro ofizialetan azken azterketak eta gainerako behin betiko gaitasun eta ebaluazio probak egiteko eta beharrezkoa den denborako baimena izango du langileak azterketa horien egunetan, betiere behar bezala justifikatzen badu.

   • "Azken azterketetan" eta "behin betiko gaitasun eta ebaluazio probetan", programaren zati batez liberatzeko partzialak edo amaierakoak barne hartuko dira.

   • Halaber, Administrazioetako edo erakunde publikoetako kidegoetan edo eskaletan sartzeko deialdietan aurreikusita dauden hautespen-probetako ariketak barne hartuko dira.

   • Baimenaren iraupena ahalik eta laburrena izango da, baina nahikoa arauaren helburua bete ahal izateko (azterketak eta behin betiko gaitasun-probak egiteko aukera ematea).

   • Baimena emateko edo ukatzeko aukera aurreko paragrafoan adierazitako irizpide orokorrera egokitzeko, kasu bakoitzeko zirkunstantzia bereziak behar bezala aztertu beharko ditu Zuzendaritza honek.

   • Orientazio-izaera orokorrez, esan beharra dago azterketak nahitaez (funtzionarioak aukera egin gabe) beste herri batean egin behar izanez gero, baimena azterketak egiteko behar den denboran luzatuko dela, azterketa egin beharreko lekura joateko behar den denbora erantsita.

   • Orientazio-izaera orokor berarekin, adierazi beharra dago azterketak herrian bertan, eta egun baliogabean edo funtzionario eskatzailearen lan-ordutegitik kanpo egin behar izanez gero, baimena ematea ez dela bidezkoa izango.

7. – Kontsulta, tratamendu eta azterketa medikoak egiteko baimena:

   Norberaren premiak direla eta, lan-orduetan kontsulta, tratamendu eta azterketa medikoak egiteko baimena izango dute funtzionarioek, bertara joateko behar besteko arrazoiak daudenean, eta egiten diren zentroetan dagoen kontsulta-ordutegiak lan-orduez kanpo joateko aukerarik uzten ez duenean. Iraupena, eskuarki, beharrezkoa den denborarakoa eta gehienez 4 ordukoa izango da, behar bezala frogatutako kasu berezietan izan ezik. Baimen hori ordaindutakoa izango da.

   Umea jaio aurreko azterketak egiteko eta erditzea prestatzeko teknikak ikasteko beharrezkoa den denborarako baimen ordaindurako eskubidea izango du haurdunaldian dagoen funtzionarioak, eta ordaindu egingo zaio. Horretarako, frogatu egin beharko da azterketak lanaldiaren barruan egin behar direla, eta funtzionarioa benetan bertara joan dela.

   Era berean, funtzionarioek bigarren mailara bitarteko odolkidetasun edo kidetasuneko senitartekoei (edo beste maila urrunago batera bitartekoei, elkarrekin biziz gero) lagundu ahal izango diete medikuen kontsultetara, tratamenduetara eta azterketetara, baldin eta lagundu beharreko pertsonen zirkunstantziengatik beharrezkoa bada, eta zentroek lan-orduz kanpo joateko aukerarik ematen ez badute. Horretarako erabilitako denbora hilabete bateko epean sartu beharko da.

8. – Seme edo alaba baten erditze, adopzio edo harreragatiko, eta hamar hilabetetik beherako seme edo alaba baten edoskitzeagatiko baimena:

1. – Erditzearen kasuan, baimenaren iraupena hamazazpi astekoa izango da, eta etengabea izango da. Erditze anizkoitzen kasuan, bigarrenetik aurrerako seme edo alaba bakoitzeko beste bi astetan zabaldu ahal izango da. Baimena funtzionarioak nahi bezala banatuko da (erditzearen aurretik zein ondoren), betiere erditu eta hurrengo sei asteak ezinbestekoak direla kontuan hartuta. Ama hiltzen bada, aitak hartu ahal izango du baimen osoa edo, hala badagokio, geratzen den zatia.

   Aurrekoa gorabehera, eta erditzearen ondorengo sei asteko atsedenaldia, amarentzako nahitaezkoa dena, aparte utzi gabe, aitak eta amak lan egiten badute, amatasunagatiko atsedenaldia hasitakoan amak aukera izango du aitari erditzearen ondorengo atsedenaldiaren zati zehatz eta etengabea uzteko, berarekin batera, edo berea amaitutakoan, une horretan lanera itzultzea amaren osasunerako arriskutsua denean salbu.

   Atsedenaldiak aldi berean hartzen diren kasuetan, aldi horien baturak ez ditu aurreko paragrafoetan aurreikusitako hamazazpi asteak, edo erditze anizkoitzaren kasuan dagozkienak gaindituko.

   Erditze goiztiarren kasuan, eta jaioberriak erditzearen ondoren ospitaleratuta jarraitu behar duenean, amak edo, halakorik ezean, aitak eskatuta, ospitaleko altaren datatik aurrera zenbatu ahal izango da baimena. Amak nahitaez atseden hartzeko diren erditzearen ondorengo lehen sei asteak zenbaketa horretatik kanpo geratzen dira. Kasu horretan, lana ordu batean uzteko eskubidea izango du funtzionarioak. Era berean, lanaldia murrizteko eskubidea izango du, gehienez bi orduz; orduan, ordainsariak proportzio berean murriztuko zaizkio.

   Baimenaren aldi osoa agortu ondoren emakume langilea lanera normal itzultzea eragozten dion osasun-egoeran badago, gaixotasunagatiko baja-egoeran geratuko da, baina horretarako behar diren izapideak bete beharko ditu.

2. – Sei urtetik beherako haurren adopzioaren edo harreraren (adopzio aurrekoaren zein iraunkorraren) kasuetan, baimenaren iraupena hamazazpi aste etengabekoa izango da. Adopzio edo harrera anizkoitzen kasuan, bigarrenetik aurrerako seme edo alaba bakoitzeko beste bi astetan zabaldu ahal izango da baimena, harrerari buruzko erabaki administratibo edo judizialetik aurrera, edota adopzioa gauzatzen duen ebazpen judizialetik aurrera kontatzen hasita (funtzionarioak aukeratuko du). Halaber, baimenaren iraupena hamazazpi astekoa izango da sei urtetik gorako adingabeen adopzio edo harrera kasuetan, betiere adingabe horiek ezinduak edo minusbaliatuak badira, edota beren zirkunstantzia eta esperientzia pertsonalen ondorioz, edo atzerritarrak izateagatik, gizarteratzeko eta familian txertatzeko zailtasun bereziak –gizarte-zerbitzu eskudunek behar bezala egiaztatuak– badituzte. Bai amak, bai aitak lan egiten dutenean, baimena interesatuek nahi bezala banatuko da, eta aldi berean zein bata bestearen ondoren hartzeko aukera izango da, betiere etengabeko aldietan.

   Atsedenaldiak aldi berean hartzen diren kasuetan, aldi horien baturak ez ditu aurreko paragrafoetan aurreikusitako hamazazpi asteak, edo adopzio edo harrera anizkoitzaren kasuan dagozkienak gaindituko.

   Nazioarteko adopzioetan, gurasoek aldez aurretik adopzioan hartutakoaren jatorrizko herrialdera joan behar dutenean, adopzioa gauzatzen duen ebazpena baino lau aste lehenago hasi ahal izango da artikulu honetan kasu bakoitzerako aurreikusitako baimena.

3. – Erditze, adopzio edo harreragatiko baimenak lanaldi osokoak edo lanaldi partzialekoak izango dira (funtzionarioen aukeran), betiere zerbitzuaren beharrek aukera ematen badute, lana eta familia uztartzeko neurriei buruzko urtarrilaren 30eko 180/2004 Errege Dekretuan xedatu bezala.

4. – Era berean, funtzionarioak lanean ordubeteko etenaldia egiteko eskubidea izango du hamar hilabete baino gutxiagoko seme-alaba bakoitzeko; denbora hori zati bitan bana dezake titia edo biberoia emateko. Emakumeak, bere borondatez eta helburu berarekin, lanaldi arruntaren murrizketa batekin ordezkatu ahal izango du eskubide hori (ordu-erdi hartu ahal izango du lanaldiaren hasieran eta amaieran, edota ordubete lanaldiaren hasieran edo amaieran). Biberoia eman behar den kasuan, lanaldia eten edo murrizteko eskubidea aitari ere eman dakioke, honek eskatu eta honako puntu hauek frogatu ondoren: ama langilea dela eta baimena hartzeari uko egiten diola edo hartu ezin duela.

   Funtzionarioak aurreko paragrafoan azaldutako lizentziari eutsi, edo denbora hori haurdunaldi eta erditzeagatiko lizentziari gehitzeko aukera izango du. Kontuan hartu behar da lan egin daitekeen egunetako orduak soilik zenba daitezkeela. Hori dela eta, funtzionarioak eskaera egiten duenean, hamargarren hilabetea bete arte geratzen den denbora-tartean lizentziak, baimenak, oporrak edo eszedentziak eskatuko dituen jakinarazi beharko du, aldi horiek zenbaketatik salbuesteko.

9. – Nahitaezko betebehar publiko edo pertsonal bat egiteko ezinbestekoa den denborarako baimena:

   Nahitaezko betebehar publiko edo pertsonal bat egiteko, behar beste denborarako baimena izango dute funtzionarioek, baldin eta lan-orduetatik kanpo egiterik ez badago.

   • Nolanahi ere, honako hauek hartuko dira nahitaezko betebehar publiko edo pertsonaltzat:

     1. Epaitegi, polizia-etxe, gobernu zibil edo militarren deiak, arma-ikuskapenak edo militarrak, nortasun-agiria, pasaportea, ziurtagiriak eta erregistro-izapideak erakunde ofizialetan.

     2. Bigarren mailara bitarteko odolkidetasun edo kidetasuneko senitarteko minusbaliatu psikiko edo fisikoei beren egoerari dagozkion izapideak egiten laguntzea.

     3. Gidabaimena eskuratzeko edo eraberritzeko azterketa.

     4. Notario deiak eta izapideak.

     5. Erakunde ofizialetan egin beharreko izapideak.

     6. Zinegotzi, diputatu, batzar nagusietako kide edo legebiltzarkide izateagatik gobernu-organoen edo horien menpeko batzordeen bileretara joatea.

10. – Lanaldia murrizteko baimena:

1. – Legezko zaintzari lotutako arrazoien ondorioz hamabi urtetik beherako adingabe bat, arreta berezia eskatzen duen edadetu bat, edo ordaindutako jarduerarik egiten ez duen minusbaliatu psikiko edo fisiko bat zuzeneko zaintzapean duen funtzionarioaren lanaldia murrizteko baimena.

   Legezko zaintzari lotutako arrazoien ondorioz hamabi urtetik beherako adingabe bat, arreta berezia eskatzen duen edadetu bat, edo ordaindutako jarduerarik egiten ez duen minusbaliatu psikiko edo fisiko bat zuzeneko zaintzapean duen funtzionarioak lanaldia bosten batean, heren batean edo erdian murrizteko eskubidea izango du. Kasu horretan, ordainsariak proportzio berean murriztuko dira (kontzeptu guztietan). Minusbaliatu fisiko edo psikiko batengatik pentsio bat jasotzea ezin da jarduera ordaindua egitearekin parekatu eta, beraz, legezko zaintza esleituta duenak lanaldia murrizteko eskubidea izango du.

   Istripu edo gaixotasun baten ondorioz bere kabuz moldatzeko gauza ez den eta ordaindutako jarduerarik egiten ez duen bigarren mailara bitarteko odolkidetasuneko edo kidetasuneko senitarteko baten zuzeneko zaintzaz arduratu behar duen funtzionarioak eskubide berbera izango du, senide hori berarekin bizi bada, beti ere.

2. – Aurretiko erretiroaren ondorioz.

   Funtzionarioei nahitaezko erretiroko adinera iristeko bost urte baino gutxiago geratzen zaizkienean, lanaldia erdira murriztea eskatu ahal izango dute, betiere zerbitzuaren beharrek aukera ematen badute. Kasu horretan, ordainsariak proportzio berean murriztuko dira.

3. – Funtzionarioak osatzeko duen beharraren ondorioz.

   Lanaldiaren murrizketa hori (erdira, ordainsariak ere proportzio berean murriztuta) gaixotasunen ondorioz osatzeko prozesuak behar dituzten funtzionarioek eskatu eta lortu ahal izango dute aldi baterako, betiere zerbitzuaren beharrek aukera ematen badute.

4. – Norberaren interesagatik.

   Betetzen duen lanpostuari dagozkion funtzioekin bateragarria bada eta, nolanahi ere, entzunaldi publikorako finkatutako ordutegia errespetatzen badu, lanaldia erdira edo heren batean murriztea eskatu ahal izango du karrerako funtzionarioak. Kasu horretan, ordainsari guztiak (hirurtekoak barne) proportzio berean murriztuko dira. Norberaren interesagatik eskatutako lanaldi-murrizketa emateko, zerbitzuaren beharrak hartuko dira kontuan, eta murrizketa hori bateraezina izango da murrizten den ordutegian edozein motatako jarduera (ordaindua zein ordaindu gabekoa) egitearekin. Eskabidea urtebeterako izango da gutxienez. Baimen hori amaitu eta gero, ezin izango da beste halako baimenik eskatu, harik eta amaitzen denetik hiru urte igaro arte. Jarduneko zerbitzuan sartu edo zerbitzura itzuli ondoren bi urte pasa eta gero baino ezingo da eskatu baimen hori.

11. – Hautapenezko karguari dagozkion funtzioak betetzeko baimena:

    Erakundeetako hautapenezko kargudun diren funtzionarioek kargu horien ondoriozko funtzioak (9.f) artikuluko kasuetan barne hartu gabekoak) betetzeko baimena izango dute, horretarako behar den denboran, betiere guztira urteko lanaldiaren ehuneko 10 gainditzen ez bada. Baimenari dagokion denborak ez du ezein ordainsari jasotzeko eskubiderik emango, eta dagokion denbora errekuperatu egin beharko da. Egoera horretan dauden funtzionarioek, halaber, lanaldi arrunta bosten batean, heren batean edo erdian murrizteko baimena izango dute; kasu horretan, ordainsaria proportzio berean murriztuko da kontzeptu guztietan.

12. – Gaixotasun kronikoak edo mugitzeko arazoak dituzten senitartekoak zaintzeko baimena:

    Bigarren mailara bitarteko odolkidetasuneko zein kidetasuneko senitartekoak (edo beste maila urrunago batera bitartekoak, elkarrekin biziz gero) zaindu behar dituen langileak (mugitzeko arazoak izateagatik edo txosten medikoaren bitartez egiaztatutako gaixotasun larria eta jarraitua jasateagatik) urteko berrogeita hamar orduko baimen ordaindurako eskubidea izango du. Oro har, egunean bi ordu erabili ahal izango dira 50 orduko kreditu horretatik, hain zuzen ere, lanera sartzean edo lanetik irtetean.

1. – Norberaren edo senitartekoen ezkontzagatiko lizentzia.

2. – Prestakuntza eta hobekuntza ikastaroak egiteko lizentzia.

3. – Norberaren beharretarako lizentzia.

4. – Praktiketako funtzionario izendatzeko lizentzia.

5. – Gaixotasun edo istripuagatiko lizentziak.

1. – Norberaren edo senitartekoen ezkontzagatiko lizentzia:

1. – Norberaren ezkontzaren kasuan, 20 egun naturaleko lizentzia baterako eskubidea izango dute funtzionarioek.

2. – Funtzionarioek izatezko bikote batean bizikidetza egonkorra hasten dutenean, eskubide bera izango dute, betiere egoera hori Izatezko Bikoteen Erregistroak emandako Inskripzio Ziurtagiriaren bidez egiaztatzen bada, izatezko bikoteak arautzen dituen maiatzaren 7ko 2/2003 Legean ezarritakoari jarraiki.

   Ebazpen honek indarra hartu eta gero bizikidetza egonkorrean hasten diren langileentzat baino ez da izango lizentzia hau.

   Lizentziaren hogei egunak egun naturaltzat hartu behar dira, eta ezkontza egiten den edo erregistroan izatezko bikote gisa izena ematen den egunaren aurretik edo ondoren hartu ahal izango dira, baina, edonola ere, egun hori barne hartuta geratuko da.

   Lizentzia hori oporraldiarekin metatu ahal izango da, oporraldiaren aurretik edo ondoren. Kasu horretan, gutxienez 15 eguneko aurretiaz jakinarazi beharko zaio Giza Baliabideen Zuzendaritzari, Bulego Judizialeko arduradunaren, fiskalburuaren edo Auzitegiko Medikuntzako Euskal Erakundeko zuzendariaren bitartez.

   Ezkontza edo bizikidetza egonkorra dela eta, ezin izango da beste lizentzia bat hartu 6 urte igaro arte, eta inolaz ere ez bikotekideak berak direnean.

3. – Ezkontzen direnak langilearen gurasoak, aita-amaginarrebak, neba–arrebak, suhi-errainak, seme-alabak, ilobak edo aitona-amonak direnean, langileak ezkontza-eguna izango du libre, baina, ospakizuna langilearen bizilekutik 150 km baino urrutiago egiten bada, hiru egun natural emango zaizkio, joan-etorria errazteko.

2. – Prestakuntza eta hobekuntza ikastaroak egiteko lizentzia:

   Honako kasu hauetan eman ahal izango dira prestakuntza eta hobekuntza lizentziak:

   • Eusko Jaurlaritzako Justizia Sail honek antolatuta urtean egiten diren prestakuntza-planetan barne hartutako prestakuntza-ikastaroetara joateko. Lizentziaren iraupena eta modua egin beharreko ikastaroek duten iraupenaren eta programazioaren araberakoak izango dira, eta ez dute inolako mugarik eragingo lansariei dagokienez.

   • Funtzionarioaren kidegoaren berezko funtzioei lotuta dauden eta funtzio horiek gauzatzeko prestakuntza osatzea helburu duten ikastaro, kongresu edo jardunaldietara joateko. Lizentzia hori emateko, zerbitzuaren beharrak eta aurrekontu-baliabideak hartuko dira kontuan; iraupena, berriz, ikastaro, kongresu edo jardunaldien araberakoa izango da. Lizentziak oinarrizko ordainsariak eta kargurako seme edo alaba bakoitzeko prestazioak jasotzeko eskubidea emango du.

3. – Norberaren beharretarako lizentzia:

1. – Norberaren eginkizunetarako lizentzia, oso arrazoi biribilagatik ez bada, jardunean hasi edo lanera berriz sartu eta urtebete igaro arte ezin izango da eskatu.

   Funtzionarioek norberaren beharretarako lizentziak eskatu ahal izango dituzte, ezein ordainsari jasotzeko eskubiderik gabe. Lizentziaren aldia oporrak kalkulatzeko zenbaketatik salbuetsiko da, eta lizentziaren iraupen metatua hiru hilabetekoa izango da gehienez, lan egindako bi urteko. Lizentzia emateko, zerbitzuaren beharrak hartuko dira kontuan. Bi urteak lizentzia hartzen den egunetik hasiko dira zenbatzen; hori horrela, segidako hiru hilabeteko aldirako ematen bada, ezin izango da beste bat eman bi urte igaro arte, lehenengoaren hasierako egunetik aurrera kontatzen hasita. Aldi laburragoetan, halaber, hasierako egunetik hasiko da zenbatzen, baina bi urteko epearen barruan norberaren beharretarako beste baimen batzuk eman ahal izango dira, hiru hilabeteak osatu arte. Zenbaketa horren ondorioetarako, hasieratik amaierara bitarteko egunak hartuko dira lizentziako eguntzat, lanegunak ala jaiegunak diren kontuan hartu gabe. Lizentziaren emakida denboraldi laburretan zatitu ahal izango da, hiru hilabeteko gehieneko iraupenera iritsi arte. Horrela, beraz, kasu gehienetan larunbateko eta igandeko lansariak osorik ordainduko dira, hain zuzen ere aurreko egun baliodunetan lan egin izanagatik. Ondorioz, konparaziozko bidegabekeria dago hilabete osoetarako edo zatikatuetarako emandako lizentziekiko, kasu horietan larunbateko eta igandeko ordainsaria barne hartzen baita deskontuan. Lizentzia hau eman daitekeen kasu guztiei tratamendu berdina emateko, honako formula hau aplikatuko da:

   Hilabeteko ordainsaria, guztira + Aparteko ordainsariak