Ongi etorri Legegunea atarira

Barruko urak izango dira jurisdikziopeko itsasoa mugatzeko erabiltzen diren lerro zuzenen barruan daudenak, abuztuaren 5eko 2510/1977 Dekretuak ezarritakoari jarraiki 

Horrela bada, eskumen-eskualdaketa honen bidez, aurreko idatz-zatian zehaztutako lurralde-eremuari dagozkion barruko uretan, Eusko Jaurlaritzak hartuko ditu bere gain barruko uretako arrantzaren, itsaski-bilketaren eta akuikulturen gaineko eginkizunak, Nekazaritzako eta Arrantzako Ministerioak betetzen zituenak; hona hemen eginkizun horiek (indarrean dagoen legerian daude ezarrita): 

1. Barruko uretako arrantzari dagokionez: 

a) Arrantzan jarduteko baimenak ematea. 

b) Arrantza-tresnak, aparailuak, lanabesak eta ekipamenduak arautzea. 

c) Arrantza-guneak mugatzea eta, horretarako, araudi bereziak prestatzea gune bakoitzerako. 

d) Honako hauek ezartzea: debekualdiak, arrantzarako eguneroko ordutegia, arrantzan jarduteko egunak eta, behar denean, lanabesak jarraituki botatzeko denbora ere bai. 

e) Baimendutako espezieak zeintzuk diren zehaztea eta gutxieneko tamainak ezartzea. 

f) Ikuskaritza arautzeko eta zigorrak jartzeko arauak egitea. 

g) Jardueren, baliabideen eta pertsonen erregistro ofiziala ezartzea, arrantza egiten duten pertsona fisikoak eta juridikoak barne. 

2. Itsaski-bilketari eta akuikulturari dagokienez: 

a) Baimenak eta emakidak ematea hainbat jarduera egiteko:

- Algak, moluskuak eta itsaskien eta itsas haztegien bestelako establezimenduak ustiatzea.

- Parkeak, ur gaineko haztegiak, itsaski-haztegiak, moluskuen araztegiak, eta itsaskien eta itsas haztegien bestelako establezimenduak jartzea.

- Oro har, itsasotik produktuak ateratzeko edozein jarduera. 

b) Hondartza eta arrantza-toki natural jakin batzuk partzelatzea, eta kopuruak, arrantza-debekualdiak eta ordutegiak finkatzea. 

c) Baimendutako espezieak zeintzuk diren zehaztea eta ustiatze-mota desberdinen araudiak ezartzea. 

d) Itsaski-bilketarako eta itsas haztegiak jartzeko interesgarriak diren guneak zehaztea. 

f) Ikuskatze-lanak egiteko eta zigorrak jartzeko arauak ematea. 

3. Astialdiko jarduerei dagokienez:Aisiako jarduerak arautzea; eta, horri dagokionez, Estatuko Administrazio Zentralak edo beste lurralde-erakunderen batek jolas-arrantzarako emandako baimenak ontzat ematea. 

4. EAEk zorrotz bete beharko ditu Espainiak parte hartzen duen itunen eta hitzarmenen ondorioz bete beharrekoak diren xedapenak; eta kontuan izan beharko ditu jarduerak koordinatzeko arau orokorrak, baldin eta jarduera horiek arrain-espezieen ustiapenean eta EAEren barruko uretatik kanpo dauden bestelako baliabide naturaletan eragina izan ahal badute. 

5. Nekazaritzako eta Arrantzako Ministerioak eta Eusko Jaurlaritzak koordinazio-tresnak ezarriko dituzte elkarren artean, beren gain hartu dituzten eginkizunak eraginkortasunez kudeatzeko eta informazioa behar den moduan trukatzeko.