Ongi etorri Legegunea atarira

1. atala.– Dekretuaren xedea eta eremua.

1. – Dekretu honen xedea hau da: inoren baliabideak erabilita osasun-zerbitzuak emateko itunei aplika behar zaizkien gutxieneko betebeharrak eta baldintzak arautzea, eta osasun-zentroak Osasun Sailarekin itunak egiteko garaian homologatutzat jotzeko baldintzak ezartzea.

2. – Osasun-zerbitzuak osasun-itunen bitartez eskaintzeko, Osasunari buruzko Planean ezarritako lehentasunei men egingo zaie, dauden aurrekontuak kontutan hartuta eta baliabide publikoak ahalbait ongien erabiltzeko irizpideari eutsiz.

3. – Osasun Sistema Nazionaletik kanpoko zerbitzu eta zentroen babesean dauden herritarrei osasun-asistentzia emateko Osasun Sailak egindako itunak ere sartuko dira dekretu honetako xedapenen aplikazio-eremuan.

2. atala.– Itunduko diren osasun-zerbitzu eta -prestazioak.

   Hauek dira itundu ahal izango diren osasun-zerbitzu motak:

   1. Lehen mailako atentzioa: zerbitzu eta proba anbulatorioak, etxeko atentzioa, larrialdiko etxeko atentzioa, errehabilitazioa, eta diagnostiko eta tratamendurako beste zerbitzu bereziak.

   2. Atentzio espezializatua: ospitalizazio zerbitzuetan, asistentzia medikoa, kirurgikoa eta larrialdikoa dituztenak; eta kanpo-kontsultetan, errehabilitazioa eta ospitalizazio-erregimenean zentroek emandako beste teknika eta prozedura batzuk. Horietaz gainera: itundutako ospitaleetan egiten diren protesi finkoak, zaindutako ostatu-hartzea, eguneko zentroak eta ospitalizazioa osasun mentalaren atentzioaren arloan.

   3. Programatutako osasun-garraioa eta larrialdikoa.

   4. Haurren aho-hortzetako atentzioa.

   5. Etxeko oxigenoterapia eta aireztapen-terapia, eta dialisi-teknika anbulatorioak, legez ituntzat hartzen diren kasuetan.

   6. Desintoxikazio- eta errehabilitazio-tratamendua terapia elkarte batean, «Drogazalekeriei aurrehartze, soroste eta birgizarteratzeari buruzko azaroaren 11ko 15/1988 Legean» jasoa.

   7. Osasun Sistema Nazionalaren osasun-prestazioen ordenazioari buruzko urtarrilaren 20ko Errege Dekretuaren eremuko beste osasun-zerbitzuak edo geroan ezar daitezkeen bestelako prestazioak, salbu eta urtarrilaren 22ko Dekretuak arautzen dituen kanpo-protesiak, gurpil-aulkiak, ortosiak eta protesi bereziak.

3. atala.– Itunak gauzatzeko betebeharrak.

   Hauek dira osasun zentroek, establezimenduek eta zerbitzuek osasun asistentziako itunak izenpetzeko konplitu behar dituzten betebeharrak:

   1. Osasun Sailaren funtzionamendu-baimena edukitzea, osasun zentroak, zerbitzuak eta establezimenduak irekitzeko, jardunean ipintzeko eta aldatzeko araudiarekin bat; Euskal Autonomi Elkartetik kanpoko zentroek tokian tokiko osasun administrazio eskudunaren baimena beharko dute.

   2. Ospitalak homologatzeko finkatuta dauden irizpideak betetzea, edota ospitalez besteko osasun zentro eta zerbitzuentzako homologazio-oinarriak (4. atalean adieraziak) betetzea, gainontzeko prestazioen kasuetan.

   3. Osasun alorrean indarrean dauden legeei men eginez, osasun zerbitzuak ituntzeko bateraezintasun gorabeherarik ez edukitzea.

   4. Erantzukizun zibileko asegurua izatea, kontratatutako zerbitzuak estal ditzan.

   5. Herri Administrazioen Kontratuetarako 13/1995 Legeak Administrazioarekin kontratuak egiteko ezartzen dituen baldintzak betetzea, bai eta Osasunari buruzko Lege Orokorrak berariaz ezarritakoak ere.

4. atala.– Itunak egiteko, zentroen eta zerbitzuen homologaziorako irizpideak eta prozedura.

1. – Itunen bidez zerbitzu publikoak emateko kudeaketa-kontratua egiten duten ospitale orokorrek edo/eta monografikoek Osasun Sailaren homologazioa izan behar dute eta, horretaz gainera, dekretu honetako 3. atalean aipatzen den kaudimen teknikoa bermatu dezakeen konplexutasunaz hornituta egongo dira.

2. – Ospitaleak homologatzeko prozedura, ematen diren zerbitzuen konplexutasun-mailan oinarrituta, zentroaren osagaiak eta hornidura kontutan hartuta egingo da, alegia, alderdi hauek kontutan hartuta:

   1. Gaixoen sailkapenean oinarriturik, prozesu diagnostikoak, terapeutikoak edo asistentziaren segimenduzkoak gauzatzeko gaitasuna.

   2. Teknika eta asistentzia alorreko egitura eta baliabideak.

   3. Zerbitzu-kartera.

   4. Zentroaren antolamendua, kudeaketa eta onarpena.

   5. Langile-motak eta haien kualifikazioa.

   6. Osasun jarduerari euskarri eta laguntza logistikoa eskaintzeko zerbitzuak.

   7. Ekonomia eta finantza mailako kaudimena.

3. – Aurreko puntuan homologazioa lortzeko aipatzen diren gutxieneko baldintzak direla eta, zentroek dekretu honen I. eranskina bete beharko dute.

4. – Osasun Sailarekin itunak egin ahal izateko, ospitaleek homologazio-eskabidea aurkeztu beharko diote, dekretu honetako 4.3 atalean adierazitako agiriekin batera, Aseguramendu eta Kontrataziorako zuzendariari. Honek, zentroaren kalitatea eta asistentzia mailako hornidura kontutan hartuta eta erabiltzaileen konplexutasun terapeutikoaren mailari begiratuta, ospitale bakoitzari konplexutasun-maila bat esleitu ostean, ebazpena emango du.

5. – Homologatutako ospitaleek aukera izango dute esleitu zaien konplexutasun-maila alda dadin eskatzeko. Horretarako, maila eman zitzaien garaiaz geroztik zentroaren egoera aldatu egin dela egiaztatzen duten agiriak aurkeztu beharko dituzte.

6. – Itundutako ospitaleko atentzioko zerbitzuei dagokienez, ospitaleen homologazioa dekretu honetako II. eranskinean agertzen den konplexutasun-mailaren araberako sailkapena aintzat hartuta egingo da.

7. – Arauzko xedapenik ematen ez den bitartean, Ospitale Onkologikoa eta Egonaldi Ertaineko eta Luzeko Ospitalea zuzenean homologatuko dira dekretu honetako II. eranskineko IV. eta V. konplexutasun-mailetan, hurrenez hurren.

8. – Ospitalez kanpoko zentro eta zerbitzuekin itunak egiteko betebeharrak zerbitzu publikoen kudeaketa-kontratua itun bidez prestatzeko oinarri teknikoen pleguan ezarritakoak izango dira, harik eta zerbitzu bakoitzari berariazko homologazio-irizpide bat ezartzen zaion arte.

   Kontratazio-organoak ezarriko ditu, beren-beregi, zerbitzu hauek konplitu behar dituzten baldintzak eta betebeharrak.

9. – Homologazio-ebazpenak bost urteko iraunaldia izango du. Horren ondoan, ospitaleek homologazio berria eskatu ahalko dute –gutxienez indarraldia amaitu baino hiru hilabeteko lehenago–, dekretu honetan xedatutako baldintzen arabera.

5. atala.– Itunen gutxieneko edukiak.

1. – Izenpetutako itunetan, gutxienez, alderdi hauek jaso beharko dira:

   1. Itundutako zentro edo zerbitzuaren lurralde-eremua.

   2. Erabiltzaileak zerbitzuaz baliatzeko sistema eta betekizunak.

   3. Erabiltzailearen eskubideen bermea eta herritarren eskubide-betebeharrei buruzko informazioa, Osasun Sistema Nazionalaren osasun-prestazioen ordenazioari buruzko urtarrilaren 20ko 63/1995 Errege Dekretuaren 6. atalean xedatutakoaren arabera.

   4. Zerbitzuen mamia eta itundutako prestazioen zedarritzea.

   5. Kalitatea neurtzeko parametroak eta estandareak.

   6. Itundutako zerbitzuak ordaintzeko modua. Ordainketa finkoak eta osagarrizkoak. Fakturazio prozedura eta Osasun Sailean aurkeztu beharreko agiriak.

   7. Ituna monitorizatzeko eta ebaluatzeko prozedura.

   8. Itunaren iraunaldia, ezeztatzea (dekretu honetako 7. atalean adierazitako kasuak) eta ez betetzeagatiko zigor-koadroa.

   9. Herri Administrazioen Kontratuetarako 13/1995 Legeak eta honelako kontratuak arautzen dituzten beste lege-manuek eskatutako gainerako betekizunak.

2. – Indarrean dauden legeetan jasotzen denarekin bat, izenpetzen diren itunetan bermatu egingo da ezen, osasun zerbitzua jasotzeko eskubidea duten herritar guztiei arreta berbera eskainiko zaiela, salbu eta unean uneko asistentzioa–prozesuari berari zor zaizkion gorabeheretan gertatzen diren aldeak.

3. – Itundutako erakundeek eskainitako osasun-zerbitzuetan hirugarren bat ordaintzera behartuta dagoenean, zerbitzuok ez dira itunaren kontura ordainduko. Baina fakturazioa Osasun Sailaren gain egiten bada, Sailak erregulatu egingo du itundutako zentroen faktura, edo emandako eta fakturatutako osasun-zerbitzuen kostua eskatuko die ordaintzera behartuta dauden erakunde, partikular edo hirugarrenei, 63/1995 Errege Dekretuaren II. eranskian ezarritakoaren arabera.

6. atala.– Itundutako zerbitzuak ordaintzeko bideak eta baldintza ekonomikoen berrikustea.

1. – Hauek izango dira baldintza ekonomikoen arabera osasun-itunei aplikatuko zaizkien ordainketa-erak:

   Ospitaleko asistentzia.

   1. Prozesu mediku eta kirugikoak: tarifa orokor homogeneoak ezarriko dira, patologia edo diagnostiko-taldeen arabera, gaixoari emandako zerbitzuetan oinarrituta.

   2. Asistentzia Kosturako Unitatea ( AKU): gehienezko tarifa orokor homogeneoak ezarriko dira, konplexutasunaren arabera, asistentzia zerbitzuak (kanpo-kontsultak, larrialdiak, etab...) modu haztatu batean bateratuko dituztenak. Baliokidetasuna ospitaleko egonaldi batekoa izango da.

      Itundutako gainerako zerbitzuak.

   3. Lehen mailako atentzioan, espezializatuan, garraioan eta besteetan itundutako gainerako zerbitzuak bi modutako tarifak erabiliz ordaindu ahalko dira. Bateko, banakako prestazioagatiko tarifa, eta besteko, barnehartutako populazioagatiko edo baliabideen erabilgarritasunagatiko tarifa orokorra; bi moduotako zein erabili, kasuan kasuko ekonomia, gardentasuna eta osasun eraginkortasunaren aldeko irizpideek adieraziko dute. Aipatutako zerbitzu horietako bakoitza, nolanahi ere, modu bakar batez ordainduko da.

2. – Urtero berrikusiko dira itundutako zerbitzuen baldintza ekonomikoak, Osasun sailburuaren agindu bidez.

3. – Baldintza ekonomikoak eguneratu aurretik beharrezkoa izango dute ukitutako zentro eta baltzuek kontratua berritzeko indarreko legeek eskatzen duten gaitasuna egiaztatzea. Horretarako, klausula gehigarri bat erantsiko zaio itunari, itunkideek izenpetua. Eguneratzeak urtearen hasieratik aurrera sortuko ditu ondorio ekonomikoak, ituna ekitaldi horretan bertan formalizatu ez bada behintzat; kasu horretan baldintza ekonomikoak ez dira eguneratu behar izango.

4. – Osasun-itunean prestazioak kentzeko, zerbitzuak aldatu edo handitzeko, eta asistentziako betekizun tekniko berriak sartzeko, gehigarri bat erantsi beharko zaio zerbitzu publikoen kudeaketa-kontratuari.

7. atala.– Osasun-itunak ezeztatzeko arrazoiak.

1. – Osasun-itunak ezeztatzeko arrazoiak Herri Administrazioen Kontratuetarako maiatzaren 18ko 13/1995 Legean jasotakoak izango dira.

2. – Osasun Sailak ez duela ituna betetzen, ondoko kasuetan, besteak beste, ulertuko da:

   1. Osasun-atentzioa eskaintzea, Euskal Osasun Sistemaren onuraduneei legez zor zaien doakotasuna errespetatu gabe.

   2. Osasun-zentroek eta jarduerek derrigorrez bete behar dituzten arauak eta segurtasun eta instalazioen alorreko betebeharrrak ez konplitzea.

   3. Lan legedia, Gizarte Segurantzakoa edo fiskala larriki haustea.

   4. Ezarritako helburu koalitatiboak eta koantitatiboak ez betetzea, hori itundutako zentroari egotz dakiokeenean.

   5. Itunean xedatutakoa ez betetzea.

   6. Teknika, ekonomia eta finantza mailako kaudimena ezustean galtzea; edo irekitze-baimena edo homologazio-ebazpena baliogabetzea edo iraungitzea.

3. – Zerbitzu publikoen kudeaketa-kontratuen bidez izenpetutako osasun-asistentziako itunek, gehienez, bost urteko iraunaldia izango dute, luzapenak barne. Hori osasun-zerbitzuen berezko dinamikotasunari zor zaio, eta Herri Administrazioen Kontratuetarako maiatzaren 18ko 13/1995 Legearen 158 atalean xedatutakoari loturik ezartzen da.

8. atala.– Itundutako zerbitzuen ebaluazioa eta segimendua.

1. – Osasun Sailak aldiro-aldiro egingo du osasun–asistentziako itunetan hitzartu eta erabakitakoaren ebaluazioa.

2. – Itundutako zentro eta zerbitzuak Administrazioaren esanetara egongo dira asistentziako egitura eta zerbitzuaren kalitatea egiaztatzeko egiten dituen jarduketa guztietan, eta baita Osasun Sailak ituna beteaz egiten dituen ikuskapen eta osasun-, ekonomi- eta administrazio-kontroletan ere.

3. – Osasun Sailak, ikuskatze zereginaren harian, itundutako zerbitzuei egindako bisiten aktak egingo ditu. Bertan, zerbitzu publikoen kudeaketa-kontratuan xedatutakoa betetzen ez den kasuei dagozkien zigor ekonomikoak, itunean jasoak, edota ituna bera desegitea, proposatuko ditu. Halaber, itundutako zerbitzuetan hobekuntzak proposatu ahalko dira.

9. atala.– Itunaren Araubide Organikoa.

   Osasun Sailaren Kontratazio Mahaiaren eginkizuna da osasun–itun bidez egiten diren zerbitzu publikoen kudeaketa-kontratuen espedienteak tramitatzea eta eurotaz arduratzea, Euskal Autonomi Elkarteko Administrazioaren kontratazio araubideari buruzko ekainaren 5eko 136/1996 Dekretuan eta Kontratazio Mahaiak sortzeari buruzko uztailaren 12ko Aginduan xedatutakoaren arabera.

10. atala.– Larrialdietako espedienteak.

1. – Larrialdietan zerbitzu profesionalak, diagnostikoak edo osasun-zentroak erabili ahalko dira –Herri Administrazioen Kontratuetarako Legean jasotakoari jarraiki–; baina ahalik eta denbora gutxien egingo da hori eta sortutako asistentziako beharrizanei titularitate publikoko baliabideekin erantzuteko modua aurkitzen ez den bitartean.

2. – Horrelakoetan, izapideak 13/1995 Legearen 73. atalean aurreikusitako eran egingo dira, eta Osasun sailburuak onartuko ditu.

   ALDIBATERAKO XEDAPENA

   Dekretu hau indarrean jartzen denetik bi urteko epean, jada indarrean diren ospitaleetako osasun-asistentziako itunak dekretu honetan ezarritakoari egokituko zaizkio, homologazio eta itunen gutxieneko edukien alorretan.

   INDARGABETZE XEDAPENA

   Dekretu hau indarrean jartzen denetik aurrera, bere aurkakoak diren maila bereko edo apalagoko xedapen guztiak indargabeturik geratuko dira, bereziki «Inoren baliabideak erabilita osasun-zerbitzuak emateko, Osakidetzak egin ditzan ituneak arautuko dituzten gutxiengoak ezartzen dituen abenduaren 30eko 724/1991 Dekretua».

Ahalmena ematen zaio Osasun sailburuari dekretu hau garatzeko eta aplikatzeko beharrezkoak diren xedapenak eman ditzan.

Vitoria-Gasteizen, 1997ko apirilaren 8an.

Lehendakaria,

JOSÉ ANTONIO ARDANZA GARRO.

Osasun sailburua,

IÑAKI AZKUNA URRETA.