Ongi etorri Legegunea atarira

Lehenengo Sekzioa.–

Jardunbidearen xedapen komunak.

7. atala.– Mediku Epaimahaia izendatzea eta osatzea.

1. – Mediku Epaimahaiko kideak hiru sendagile izango dira, eta horietako bat sindikatuen ordezkariek proposatutakoa izango da. Epaimahaikideak Herrizaingo Sailak edo hala dagokion toki-erakundeko eskudun organoak izendatuko ditu.

   Era berean, ordezko sendagileak ere izendatuko dira; horiek ordezkoak egingo dituzte titularra ez dagoenean, gaixorik dagoenean edo titularraren postua bete gabe geratzen denean.

   Herrizaingo sailburuak Ertzaintza Kontseiluko funtzionarioen ordezkariei epaimahaikideak proposatzeko eskatuko die eta, era berean, hala dagokion toki-erakundeko eskudun organoak toki-erakundeetako talde ordezkariei gauza bera eskatuko die. Proposamena egiteko hilabeteko epea izango dute, eta epe horretan ez badute proposamenik egiten, Ertzaintzan edo hala dagokion toki-erakundean ordezkari gehien dituen sindikatuak proposamena egingo du eta Herrizaingo sailburuak edo hala dagokion toki-erakundeko eskudun organoak sendagilea izendatuko du.

2. – Epaimahaikideek sendagile espezialisten partaidetza eska dezakete eta kasua argitzeko medikuntza arloko behar adina proba eta azterlan egitea erabaki dezakete. Horren helburua, beti ere, zereginak ahalik eta ondoen betetzea izango da. Zeregin horretan parte hartzen duten espezialistek ez dute inolaz ere botoa emateko eskubiderik izango.

3. – Epaimahaikoek idazkaria izango dute lana errazteko, eta idazkari horrek hitz egiteko eskubidea izango duen arren, ez du botoa emateko eskubiderik izango. Idazkaria epaimahaia izendatu duen organoak berak izendatuko du, eta organo horrek hala dagokion herri-administrazioan lan hori egiteko prestakuntza aproposa duten funtzionarioen artean aukeratuko du idazkari izango dena.

   Idazkariaren zereginak Herri Administrazioen Araubide Juridikoari eta Administrazio Jardunbide Komunari buruzko azaroaren 26ko 30/1992 Legeko 25.3. atalean daude zehaztuta. Era berean, Mediku Epaimahaiak zereginak eraginkortasunez bete ditzan beharrezko diren agiri guztiak bildu beharko ditu kasuan-kasuko eskudun organoan.

8. atala.– Epaimahaiaren jarduerak.

1. – Epaimahaiak bilera arrunta egingo du hilean behin, baldin eta argitu beharreko espedienteren bat badago. Presidenteak hala eskatzen duenean premiazko edo/eta ohiko bilera egin dezakete.

2. – Lehenengo deialdian presidenteak, idazkariak eta, gutxienez, epaimahaiko beste sendagile batek egon behar dute —sendagile hori bai titularra bai ordezkoa izan daiteke—; bestela epaimahaia ez da behar bezala osatuta egongo eta ezin izango da bilerarik ez eztabaidarik egin, eta ezin izango da erabakirik hartu.

   Lehenengo deialdian ez badira epaimahaia osatzeko baldintzak betetzen, beste deialdi bat egingo da, eta bigarren deialdiko bilera egiteko zazpi eguneko epea izango da, lehenengo deialdiak huts egin zuen egunetik kontatzen hasita. Bigarren deialdiko bilerak balioa izan dezan nahikoa da goiko parrafoan aipatutako kideetako bi bertaratzea.

3. – Epaimahaiak Herri Administrazioen Araubide Juridikoari eta Administrazio Jardunbide Komunari buruzko azaroaren 26ko 30/1992 Legeko II. idazpuruko II. idazatian zehaztutakoa bete beharko du.

9. atala.– Jardunbidearen hasiera.

   Dekretu honetan zehaztutako arrazoien ondorioz 2. jarduerako egoerara igaro behar izanez gero, horretarako jarraitu beharreko jardunbidea ofizioz edo interesatuak hala eskatuta has daiteke.

10. atala.– Isilpeko informazioa.

    Osasunari buruzko txostenak isilpekoak dira, eta, hortaz, espedientea tramitatzen ari diren funtzionarioek eta gainontzeko langileek isilpean gorde beharko dute interesatuaren osasunari buruzko informazioa, hain zuzen ere, tramitazio horren ondorioz lortzen duten informazioa. Era berean, isilpean gorde beharko dute interesatua Mediku Epaimahaiarengana joan beharra, bai eta hori eragin duten arrazoiak ere.

11. atala.– Medikuaren azterketa.

1. – Behin espedientea irekiz gero, espediente hori, idazkariaren bidez, Mediku Epaimahaiari emango zaio. Espedientearekin batera txosten eta agiri guztiak emango zaizkio.

2. – Mediku Epaimahaiak interesatuari dei egingo dio azterketa bat egiteko; interesatuak bertaratzeko eta azterketa egiteko betebeharra du.

3. – Funtzionarioak, osasun-egoera dela eta, ezin badu Mediku Epaimahaiaren azterketara joan —egoera hori egiaztatzeko bere medikuaren agiri ofiziala aurkeztu beharko du—, orduan, epaimahaiak azterketa funtzionarioaren etxean edo funtzionarioa ospitaleratuta dagoen osasun-zentroan bertan egiteko beharrezko den guztia presta dezake.

4. – Funtzionarioa ez bada medikuaren azterketara bertaratzen eta horretarako arrazoiak ez baditu behar bezala egiaztatzen, epaimahaiak beste dei bat egingo dio —epaimahaiak bi dei baino ezin izango ditu egin—. Orduan ere ez bada bertaratzen edo ez agertzeko arrazoia ez badu behar bezala egiaztatzen, Mediku Epaimahaiak erabakia eman dezake espedienteko agiriak nahikoa direla uste badu; bestalde funtzionarioaren jarreraren berri emango dio eskudun organoari, horrek funtzionarioak disziplinaren arloan ustez egindako hutsak argi ditzan.

   Espedientea interesatuak berak eskatuta ireki denean interesatua ez bada azterketara bertaratzen, jardunbidea iraungi egin dela erabaki daiteke; hori Herri Administrazioen Auribide Juridikoari eta Administrazio Jardunbide Komunari buruzko azaroaren 26ko 30/1992 Legeko 92. atalari jarraituz egingo da.

12. atala.– Epeak etetea.

    Aurreko atalean aipatutako mediku-azterketa egin ondoren Mediku Epaimahaiaren ustez funtzionarioak berari dagozkion zereginak egiteko ezintasun fisikoa edo ahalmen-urritasun iraunkorra badu, eta Gizarte Segurantzak ez badu erabakirik eman lanerako ezintasun-espedientea ixteko, orduan, Mediku Epaimahaiak ondorengo epeak etetea eska dezake. Eskabide hori egiteko epaimahaiak erabaki arrazoitua hartu beharko du, eta erabaki hori loteslea izango da; bestalde, erabaki hori jardunbidea argitzeko eskumena duen organoari zuzendu beharko dio. Epeak eten egiten badira, interesatuari horren berri eman beharko zaio, bai eta eskumena duen organoari ere; era horretan, hala badagokio, beharrezko ekintzak egingo dira funtzionarioaren ezintasun-espedientearen jardunbidea tramitatzeko, eta, bidezkoa bada, funtzionarioari nahitanahiezko erretiroa emateko.

13. atala.– Mediku Epaimahaiaren erabakia.

    Mediku-azterketa egin ondoren eta espedienteko agiri guztiak aztertu ondoren, Mediku Epaimahaiak erabakia emango du; erabaki horretan zehatz eta era eztabaidaezinean argitu beharko ditu honako gai hauek:

    1. Funtzionarioak bere kategoriari dagozkion zereginak eraginkortasunez betetzeko gutxiegitasun fisiko edo/eta psikiko agerikoa, eta ustez iraunkorra, duen ala ez, eta ezintasunik izanez gero, horiek polizi lanbideko oinarrizko zerginak eraginkortasunez betetzeko oztopo diren ala ez.

    2. Bigarren jarduerako egoerara igarotzea egokia den ala ez.

14. atala.– Entzunaldiko tramiteak.

1. – Mediku Epaimahaiak hartutako erabakiaren berri emango dio instrukzioa daraman organoari; erabakiarekin batera akten eta egindako jarduera guztien kopia emango dizkio. Organo horrek entzunaldia eskainiko dio interesatuari, eta interesatuak hamar eguneko epea izango du bere ustez egokiak diren alegazio, agiri eta ziurtagiri guztiak aurkezteko.

   Interesatua ez badago ados epaimahaiak emandako erabakiarekin, eta beste medikuren batek emandako txostenak edo erabakiak aurkezten baditu, instrukzioa daraman organoak Mediku Epaimahaiari helaraziko dizkio horiek guztiak. Epaimahaiak aztertu egingo ditu aurkeztutako agiriak, eta, hala badagokio, beharrezko diren egiaztatze eta azterketak egingo ditu. Ondoren, berretsi egingo du hartutako erabakia edo, bestela, beste erabaki bat emango du.

   Instrukzioa daraman organoak egindako guztiaren berri emango dio interesatuari, eta interesatuak hamar eguneko epea izango du bere ustez egokiak diren alegazio, agiri eta ziurtagiri guztiak aurkezteko.

2. – Entzunaldia bukatutakoan intrukzioa daraman organoak aurrera egingo du espedientearen tramitazioarekin horri buruzko erabakia hartzeko.

15. atala.– Erabakia.

1. – Emandako txostena aztertu ondoren, eta kontuan izanda espedienteko agiri guztiak, eskumendun organoak bidezkoa den erabakia hartuko du.

2. – Mediku Epaimahaiak emandako txostenak lotetsi egingo du eskumendun organoa 2. jarduerako egoerara igarotzeari dagokionez. Hala ere, eskumendun organoaren ustez txosten hori baliogabetzeko moduko irregulartasunak egin badira, organo horrek txosten hori berraztertu egin dezake, administrazio jardunbideko arauei jarraituz.

3. – Dekretu honetan aipatutako arrazoiengatik 2. jarduerako egoerara igaroarazteko jardunbidea bukatzeko epea lau hilabetekoa da, espedientea ireki zen egunetik kontatzen hasita. Baina, hala ere, epe hori luzatu egin ahal izango da, baldin eta hori egitea bidezkoa bada Herri Administrazioen Araubide Juridikoari eta Administrazio Jardunbide Komunari buruzko azaroaren 26ko 30/1992 Legeko 42.2. atalean zehaztutakoaren arabera.

   Bigarren Sekzioa.– Jardunbide motak.

16. atala.– Ofizioz hasitako jardunbidea.

1. – Dekretu honetan aipatutako arrazoiengatik 2. jarduerako egoerara igaroarazteko jardunbidea ofizioz hasiko da jardunbide horri hasiera emateko eskumena duen organoak horretarako erabakia hartu duenean; erabaki hori organoak berak bere kabuz hartutakoa izan daiteke edo gorengo organo batek emandako aginduaren ondorio edo beste organo batzuek, arrazoietan oinarrituta, eskatutakoa.

   Beti ere, jardunbidea ofizioz hasiko da, jardunbideari hasiera emateko eskumena duen organoak agiri bidez baldin badaki Gizarte Segurantzako Institutu Nazionaleko lurralde zuzendariak funtzionarioak zati baterako ezintasun iraunkorra duela aitortuz erabakia eman duela.

2. – Interesatuari eta Mediku Epaimahaiko idazkariari jardunbidea irekitzeko hartutako erabakiaren berri emango zaie hamar eguneko epean, erabakia hartu den egunetik kontatzen hasita. Idazkariari medikuaren txostenak eta Herrizaingo Sailak edo, hala dagokionean, toki-erakundeak dituen agiri guztiak emango dizkiote; Gizarte Segurantzako Institutu Nazionaleko lurralde zuzendariak erabakirik eman badu, erabaki hori ere emango diote.

3. – Erabakia emateko zehaztu den epean ez bada erabakirik eman, jardunbidea iraungita dagoela ulertuko da, eta jarduerak artxibatu egingo dira; artxibatzeko eskabidea bai interesatuak bai erabakia hartzeko eskumena duen organoak egin dezake, eta horretarako epea hogeita hamar egunekoa izango da, erabakia emateko epea bukatu zen egunetik kontatzen hasita. Baina interesatuaren erruz jardunbidea eten egiten bada, erabakia emateko epea ere eten egingo da.

17. atala.– Interesatuak hala eskatuta hasitako jardunbidea.

1. – Interesatuak bigarren jarduerako egoerara igarotzeko jardunbidea hasteko eskabidea egin dezake, eta eskabide hori II. eranskinean dagoen eredu ofizialaren bidez egin beharko du. Eskabidearekin batera eskabidea egiteko dituen arrazoiak egiaztatzeko behar dituen agiri guztiak aurkeztu beharko ditu.

2. – Gizarte Segurantzak lanerako ezintasuna adierazteko espedienteari buruzko erabakia hartu badu, erabaki horren kopia ere aurkeztu beharko du eskabidearekin batera.

   Horrela ez bada, Gizarte Segurantzan lanerako ezintasuna adierazteko espedienteari hasiera eman zaiola egiaztatzen duen agiria aurkeztu beharko du. Era berean, horrekin batera medikuaren jatorrizko txostena edo horren kopia egiaztatua aurkeztu beharko du; txosten hori enpresako medikuak egindakoa edo interesatuari dagokion Osasun Zerbitzu Publikoak egindakoa izango da, edo, hala badagokio, Gizarte Segurantzako Laneko Istripu eta Gaixotasunetarako Mutuako mediku-zerbitzuak egindakoa.

   Era berean, beste mediku batzuek egindako jatorrizko txostenak edo horien kopia egiaztatuak ere aurkez ditzake.

3. – Eskumena duen organoak ez badu erabakirik ematen dekretu honetako 15.3. atalean zehaztutako epean, interesatuak bere eskabidea ez dela onartu ulertu beharko du.

18. atala.– Gaitasun psikiko edo/eta fisikoen azterketa.

1. – Bigarren jarduerako egoeran gutxiegitasun psikiko edo fisikoen ondorioz daudenei, gutxiegitasun horren izaeraren arabera, enpresako mediku-zerbitzuak aldiro-aldiro azterketa egin diezaieke.

2. – Gutxiegitasun psikiko edo/eta fisikoaren ondorioz bigarren egoerako jarduerara igarotzea eragin duten inguruabarrak aldatu egin badira —gutxiegitasunak txarrera edo hobera egin badu—, bai ofizioz bai interesatuak hala eskatuta, berriz aztertuko da egoera hori, eta horretarako jardunbidea ahalmen psikiko edo/eta fisikoen ondorioz bigarren jarduerako egoerara igarotzeko zehaztutakoa izango da.