Ongi etorri Legegunea atarira

Dekretu honen xedea estatistika-eragiketen proiektu teknikoak onartu ahal izateko prozedura arautzea da, eta bai Proiektu Teknikoen eta Estatistika Eragiketen Galdeketen Erregistroa sortzea ere.

1. – Dekretu honen aplikazio-eremua Euskal Estatistika Planean eta garapeneko Urteko Estatistika Programetan sartzen diren estatistika-eragiketen proiektu teknikoek osatzen dute.

2. – Euskal Autonomia Erkidego Estatistikari buruzko Legearen 8.1. artikuluan adierazten diren estatistika-eragiketen proiektu teknikoei aplikatuko zaie dekretu honetako 3. eta 4. artikuluetan ezarritakoa.

Dekretu honen eraginetarako, proiektu teknikotzat joko da estatistika-eragiketen betearazpen-prozedurak fase guztietan sistematizatzen dituen agiria.

1. – Euskal Estatistika Erakundeak ezarritako gidalerroen arabera egingo dira proiektu teknikoak.

2. – Gutxienez ezaugarri hauek izango dituzte proiektu teknikoek:

   1. Definizioa, helburuak eta eragiketaren zabalkundea.

   2. Metodologiaren diseinua eta, hala egokituz gero, itaun-zerrendena.

   3. Betearazteko prozedurak.

   4. Funtzioak eta erantzukizunak.

   5. Kalitatearen kontrola.

   6. Informatizazioa.

1. – Proiektu teknikoak lantzea eta aurkeztea izango da estatistika-eragiketaren lehenengo fasea, eta Euskal Estatistika Planean edo Urteko Estatistika Programetan eragiketa osoaren erakunde erantzule gisa ageri diren organo edo enteei egokituko zaie lan hori.

2. – Euskal Estatistika Erakundeak onar ditzan aurkeztuko dira proiektu teknikoak.

1. – Proiektu teknikoa jaso ondoren, Euskal Estatistika Erakundeko Koordinazio Tekniko eta Zabalkundeko Zuzendariordetzak txosten bat emango du proiektuaren edukiari buruz eta dekretu honetako 4. artikuluan ezarritakoa betetzeari buruz. Txosten hori proiektu teknikoa aurkeztu ondoren emango da, gehienez ere hamabost egun balioduneko epean.

2. – Proiektu teknikoaren edukian akatsak antzematen badira, akats horien berri emango zaie estatistika-eragiketen titular diren organo edo enteei, akatsa zuzendu dezaten. Hamar eguneko epea izango dute akatsa zuzentzeko, jakinarazpen formala egiten den egunetik kontatzen hasita.

   Akatsa zuzentzeko izapideak lehenengo paragrafoan aurreikusitako txostena emateko epearen zenbaketa etengo du.

3. – Txostena egiteko epea pasa eta txostenik egin ez bada, txostena aldekoa dela ulertuko da eta jarduerei ekingo zaie.

1. – Txostena egin ondoren edo txostena egiteko epea pasa ondoren, Euskal Estatistika Erakundeko Zuzendaritza Nagusiak ebazpena hartuko du, hamabost egun balioduneko epean, gehienez ere, proiektu teknikoa onartzeko edo ezesteko. Ezesten bada, arrazoiak azaldu beharko dira.

2. – Inola ere ez da onartuko organo eskudunak landu edo aurkeztu ez duen proiektu teknikorik, edo dekretu honetako 4.2. artikuluan adierazitako ezaugarriren bat garatzen ez duenik, estatistika-eragiketaren ezaugarrien arabera beharrezkoa bada.

3. – Estatistika-eragiketaren erantzukizuna duen Euskal Autonomia Erkidegoko Estatistika Antolakundeko organo edo enteari jakinaraziko zaio ebazpenaren edukia.

4. – Estatistika-eragiketa baten ondorengo faseekin jarraitzeko, aurretik nahitaezkoa izango da proiektu teknikoa onartzea.

Estatistika-eragiketarekin batera itaun-zerrendak landu behar direnean, proiektu teknikoen onarpenarekin itaun-zerrendak ere onartu egingo dira.

1. – Estatistika-eragiketa baten garapenean onartutako proiektuak aldaketa garrantzitsuren bat izaten badu, aldaketa horren berri eman behar zaio Euskal Estatistika Erakundeko Zuzendaritza Nagusiari, aztertzeko eta baloratzeko.

2. – Euskal Estatistika Erakundeko Koordinazio Tekniko eta Zabalkundeko Zuzendariordetzak aldaketaren edukia aztertuko du eta hamar egun balioduneko epean aldaketa zenbaterainokoa den zehaztuko du.

3. – Aldaketa garrantzitsua dela irizten bada, dekretu honetako 6., 7. eta 8. artikuluetan aurreikusitako prozedura jarraituko da. Aurkako kasua bada, proiektua eragiketaren organo edo ente erantzuleari itzuliko zaio, Euskal Estatistika Erakundeko zuzendari nagusiaren ebazpen bidez, eta itzulketaren arrazoiak adieraziz.

4. – Proiektu teknikoari egindako aldaketak itzultzeko arrazoi izango dira, besteak beste, dekretu honetako 7. artikuluko 2. idatz-zatian azaltzen direnak.

Proiektu teknikoa edo horren aldaketa onartzen duen ebazpena eman ondoren, Proiektu Teknikoen eta Estatistika Eragiketen Galdeketen Erregistroan inskribatu eta artxibatuko da.

1. Dekretu honen 2.1. artikuluan aurreikusitako Proiektu Teknikoen eta Estatistika Eragiketen Galdeketen Erregistroa sortuko da, Euskal Estatistika Erakundeko Koordinazio Tekniko eta Zabalkundeko Zuzendariordetzara atxikituta egongo delarik.

2. – Erregistroak bi atal izango ditu; bata, estatistika-eragiketen proiektu teknikoetarako, eta bestea, estatistika-eragiketen itaun-zerrendetarako.

3. – Proiektu tekniko horiei buruz, dekretu honetako 4.2. artikuluan adierazten diren ezaugarriek izaera publikoa dute. Edozein pertsona, edo erakunde publiko edo pribatuk, eskura ditzake inskribapen horiek, baldin eta erregistratutako agirietan bidezko eta zuzeneko interesa dutela egiaztatzen badute. Horretarako, aurretik, kontsultatu beharreko agirien banana-banako eskaera egin beharko dute. Ezin izango dute eskaera orokorrik egin.

4. – Aurreko idatz-zatian adierazten dena kaltetu gabe, Erregistroari atxikita dagoen organoak agindu ahal izango du inskribatutako proiektu teknikoen eta itaun-zerrenden inbentario edo katalogo bat egitea, edozein euskarritan, informatzeko eta jendeari jakinarazteko beste helbururik gabe.

1. – Proiektu teknikoak eta itaun-zerrendak inskribatzeaz gain, egiteko hauek izango ditu Proiektu Teknikoen eta Estatistika Eragiketen Galdeketen Erregistroak:

   1. Egiten diren inskribapen guztiei buruzko egiaztagiriak ematea.

   2. Erregistroan dauden agiriei buruz eskatzen diren egiaztagiriak ematea, hamar egun balioduneko epean.

   3. Artxiboan dauden agiriei buruz eskatzen diren kopia konpultsatuak ematea, eskaera egiten denetik hasi eta hamar egun balioduneko epean. Zenbat orri eta zein egunetan ematen diren adierazi beharko da, eta orriek Erregistroko zigilua edukiko dute. Kopia konpultsatuak interesdunak adierazitako eta artxibatutako agiri guztien erreprodukzioa edukiko du.

   4. Inskribatutako proiektu edo itaun-zerrendari dagokionez, aldaketak edo dagozkion gainerako gorabeherak idaztea.

   5. Estatistika-eragiketen proiektu tekniko eta itaun-zerrenden edukiaren gidalerroen eta egiteko metodologiaren berri ematea.

   6. Euskal Autonomia Erkidegoko Estatistika Antolakundea osatzen duten organoek eta enteek estatistika-eragiketen proiektu teknikoak eta itaun-zerrendak lantzeari buruz izan ditzaketen zalantza guztiak argitzea.

2. – Erregistroa zein organora atxikita dagoen, organo hori arduratuko da egiteko horietaz.

Dekretu honetan administrazio-prozedurari dagokionez aurreikusten ez denerako, Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legea aplikatuko da.

Ahalmena ematen zaio Ogasun eta Herri Administrazio sailburuari Dekretu hau garatzeko beharrezkoak diren xedapenak har ditzan.

Dekretu hau Euskal Herriko Agintaritzaren Aldizkarian argitaratu eta hurrengo egunean sartuko da indarrean.

Vitoria-Gasteizen, 2005eko apirilaren 12an.

Lehendakaria,

JUAN JOSÉ IBARRETXE MARKUARTU.

Ogasun eta Herri Administrazio sailburua,

IDOIA ZENARRUTZABEITIA BELDARRAIN.