Ongi etorri Legegunea atarira

Lehenengoa. Dekretu honek 2012ko urtarrilaren 1etik izango ditu ondorioak, aldi baterako ezintasunen (ABE) kasuetarako izan ezik, eranskinaren bosgarren paragrafoan jasotzen den bezala.

Bigarrena. Dekretu hau Euskal Herriko Agintaritzaren Aldizkarian argitaratu eta hurrengo egunean jarriko da indarrean.

Vitoria-Gasteizen, 2012ko urtarrilaren 31.

Lehendakaria,

FRANCISCO JAVIER LÓPEZ ÁLVAREZ.

Ekonomia eta Ogasuneko sailburua,

CARLOS AGUIRRE ARANA.

Justizia eta Herri Administrazioko sailburua,

IDOIA MENDIA CUEVA.

URTARRILAREN 31KO 9/2012 DEKRETUAREN ERANSKINA

Euskal Autonomia Erkidegoko 2012. urteko Aurrekontu Orokorrak onartzen dituen abenduaren 23ko 6/2011 Legeak, 19.11 artikuluan eta lege horren hamargarren xedapen gehigarrian, langileen ordainsariei buruzko aurreikuspen batzuk biltzen ditu. Neurri horiek beteko direla ziurtatzeko, 2012rako etenda geratzen dira horren aurkako akordio, hitzarmen edo itun guztiak, baldin eta haiek aplikatzea betetze horrekin bat ez badator.

Erabaki honek, hain zuzen ere, 6/2011 Legea betearazteko neurri jakin batzuk zehazten ditu, behin Euskal Autonomia Erkidegoko Administrazioko Mahai Orokorrean negoziazioaren izapidea garatu ondoren negoziazio-mahai horretan ordezkaritza sozialarekin akordiorik iritsi ez bada.

Horregatik guztiarengatik, Jaurlaritzaren Kontseiluak, Justizia eta Herri Administrazioko sailburuaren proposamenez, gaia eztabaidatu ondoren, honakoa hartu du:

ERABAKIA

«Lehenengoa. Borondatezko erretiroagatiko sariak.

Aplikazioan etenda geratzen dira, Euskal Autonomia Erkidegoko 2012. urteko Aurrekontu Orokorrak onartzen dituen 6/2011 Legearen 19. artikuluko 11. paragrafoko bigarren lerrokadan aurreikusitakoaren arabera, Euskal Autonomia Erkidegoaren sektore publikoaren zerbitzuko enplegatu publikoen borondatezko erretiroagatiko sariak arautzen dituzten lan-baldintzen akordio edo hitzarmenak. Enplegatu horiek, hain zuzen ere, Euskadiko Ogasun Nagusiaren Antolarauei buruzko Legearen testu bateginaren (azaroaren 11ko 1/1997 Legegintzako Dekretuaren bidez onartu zenaren) 7. artikuluan zehaztuak dira.

Borondatezko erretiro aurreratua erabakitzen den ebazpenean ez da aitortu ahal izango borondatezko erretiroagatiko saria jasotzeko eskubiderik.

Bigarrena. Txanda-kontratua formalizatzea.

Aplikazioan etenda geratzen dira, Euskal Autonomia Erkidegoko 2012. urteko Aurrekontu Orokorrak onartzen dituen 6/2011 Legearen 19. artikuluko 11. paragrafoko bigarren lerrokadan aurreikusitakoaren arabera, Gizarte Segurantzako organoek Euskal Autonomia Erkidegoaren sektore publikoaren zerbitzuko lan-kontratuko langileen erretiro partziala izapidetzea eta aitortzea ahalbidetzen duten txanda-kontratuak formalizatzeari buruz lan-baldintzen akordio edo hitzarmenetan bildutako konpromisoak. Enplegatu horiek, hain zuzen ere, Euskadiko Ogasun Nagusiaren Antolarauei buruzko Legearen testu bateginaren (azaroaren 11ko 1/1997 Legegintzako Dekretuaren bidez onartu zenaren) 7. artikuluan zehaztuak dira, betiere lan arloko eta Gizarte Segurantzako legedian erretiro partzialari buruz dauden baldintzak betetzen badituzte.

Salbuespen gisa, zenbait kontratu baimendu ahal izango dira, zerbitzuaren eskaintzan hobekuntza eraginkorra eta herri-administrazioko giza baliabideen erabileran eraginkortasun handiagoa gertatzen denean.

Txanda-kontratua baimentzeko kontuan hartuko den lanaldiaren gehienezko iraupena lanaldiaren portzentaje bat izango da, beharrezko dena erretiro partziala hartzen duen langilearen lanaldiaren eta txanda-hartzailearen aldi baterako kontratua formalizatzeko kontratuan jasotako lanaldiaren batura ez dadin izan, inolako kasutan, erretiro partziala eskatzen duen langileak ordu arte egiten duen lanaldiaren % 100tik gorakoa.

Txanda-kontratu bat formalizatzeko ezinbestekoa izango da aldez aurretik Funtzio Publikoaren Zuzendaritzak baimentzea.

Hirugarrena. Ordutegi-baimenak adina dela-eta.

Aplikazioan etenda geratzen dira, Euskal Autonomia Erkidegoko 2012. urteko Aurrekontu Orokorrak onartzen dituen 6/2011 Legearen 19. artikuluko 11. paragrafoko bigarren lerrokadan aurreikusitakoaren arabera, Euskadiko Ogasun Nagusiaren Antolarauei buruzko Legearen testu bateginaren (azaroaren 11ko 1/1997 Legegintzako Dekretuaren bidez onartu zenaren) 7. artikuluan zehazten diren Euskal Autonomia Erkidegoaren sektore publikoaren zerbitzuko langileen lan-baldintzen akordio edo hitzarmenak, adina dela-eta lanaldia ordainsariak murriztu gabe aldatzeko eskubidea ematen duten ordutegi-baimenak arautzen dituztenak, betiere Enplegatu Publikoaren Oinarrizko Estatutuaren apirilaren 12ko 7/2007 Legaren 48. eta 49. artikuluetan jasotako kasuak ez badira.

Laugarrena. Zerbitzu aktiboa luzatzea.

Aplikazioan etenda geratzen da, Euskal Autonomia Erkidegoaren 2012. urteko Aurrekontu Orokorrak onartzen dituen Legearen hamargarren xedapen gehigarrian ezarritakoaren arabera, Euskal Funtzio Publikoari buruzko uztailaren 6ko 6/1989 Legearen 38. artikuluaren aplikazioa, artikulu horrek arautzen baitu 65 urte betetzen dituzten funtzionarioen zerbitzu aktiboaren luzapena.

Salbuespenez, jarduera aktiboa luzatzeko eskatu ahalko da, baldin eta 65 urteko langileak benetako zerbitzuen 12 urte aitortuak baditu, eta ez, ordea, pentsioa jaso ahal izateko eskatutako gutxieneko urte-kopurua. Horrela gertatuz gero, luzapena onartuko zaio, lehen aipatutako hutsunea, falta zaion urte-kopurua, bete arte.

Halaber, luzapena onartu ahalko da behar den denbora bitartean, baldin eta zerbitzu publikoa behar bezala emateko ezinbestekoa bada profesional jakin batzuek zerbitzu aktiboan jarraitzea.

Salbuespenezko luzapen hori baimentzeko, aldez aurretik ezinbestekoa izango da Funtzio Publikoaren Zuzendaritzaren txostena.

Bosgarrena. Aldi baterako ezintasunaren (ABE) osagarriak arautzea.

Euskal Autonomia Erkidegoko Administrazioak, Gizarte Segurantzaren Legean aurreikusitakoaz gain, honako arau hauek aplikatuko ditu, Euskal Autonomia Erkidegoaren sektore publikoaren zerbitzuko enplegatu publikoentzako ABEengatiko osagarriak ordaintzeko. Enplegatu horiek, hain zuzen ere, Euskadiko Ogasun Nagusiaren Antolarauei buruzko Legearen testu bateginaren (azaroaren 11ko 1/1997 Legegintzako Dekretuaren bidez onartu zenaren) 7. artikuluan zehaztuak dira:

1. Osagarri bat ordainduko da, ordainsarien % 100 iritsi arte, aldi baterako ezintasunaldia hasten den egunetik, laneko gertakizunengatik eta honako gertakizun arrunt hauengatik:

   Ospitaleratzea.

   Ebakuntza kirurgikoa.

2. Gaixotasun arruntagatiko nahiz lanetik kanpo izandako istripuagatiko ABEen kasuetan, osagarria honako arau hauen arabera kalkulatuko da:

   1. Bajako lehenengo egunetik bajako hirugarren eguna arte (hirugarren eguna barne), ordainsarien % 50 ordainduko da, ekitaldiko lehenengo baja denean, eta % 40, bigarren bajan. Ondorengo bajetarako, osagarria laugarren egunetik aurrera ordainduko da.

   2. Bajako laugarren egunetik hogeigarren eguna arte, osagarri bat ordainduko da, ordainsarien % 75 iritsi arte.

   3. Hogeita batgarren egunetik berrogeita laugarren eguna arte, osagarri bat ordainduko da, ordainsarien % 85 iritsi arte.

   4. Bajako berrogeita bosgarren egunetik aurrera, osagarri bat ordainduko da, ordainsarien % 100 iritsi arte.

3. 2012ko urtarrilaren 1etik aurrera hasitako aldi baterako ezintasun egoeran dauden langileak, Akordio hau argitaratu eta hurrengo egunetik hasita, 2. arauaren arabera dagokion osagarria sortuko du. Ondorio horietarako, langileari baja eman zaion egunetik hasita kontatuko dira baja-egunak.

4. Honako hauek sortutako osagarri ekonomikoak:

   erditzea,

   adopzioa,

   harrera,

   aitatasuna,

   Euskal Autonomia Erkidegoko sektore publikoko langile publikoen lan-baldintzak arautzen dituzten akordio edo hitzarmen kolektiboek xedatutakoaren arabera arautuko dira aurrerantzean ere.

5. Honako egoera hauetan:

   Haurdunaldiagatiko arriskuan eta

   edoskitzaro naturalak iraun bitarteko arriskuan,

   Administrazioak prestazio ekonomikoaren osagarri bat ordainduko dio langileari, ordainsariaren % 100 jaso dezan.

6. Funtzio Publikoaren Zuzendaritzak jarraibide bat prestatuko du erabaki honen bosgarren paragraforen edukia garatzeko.

   Langileak kudeatzeko organoek emandako jarraibideek aurreko paragrafoan aipatutako Funtzio Publikoaren Zuzendaritzak Euskal Autonomia Erkidegoko Administrazio Orokorreko langileentzat emandako jarraibideetan ezarritako eduki eta printzipioak errespetatu beharko dituzte».