Ongi etorri Legegunea atarira

Arautegi honen gaztelaniazko testuan aipatutako izen guztiak (gobernu organoak, ordezkaritzak, karguak, eginkizunak eta unibertsitateko kideak) eta genero maskulinoan agertzen diren gainerakoak femeninoan ere ulertuko dira, kasuan kasuko titularraren sexuaren arabera.

1. artikulua

1. – Unibertsitateko Estatutuetako 234. artikuluaren arabera, hauek dira Unibertsitateko Klaustroaren osakideak: errektorea (bertako buru izango da), idazkari nagusia (Klaustroko idazkaria izango da), gerentea eta hirurehun kide gehiago, honetara banatuak:

   1. 153 (%51): irakasle funtzionario doktoreak

   2. 54 (%18), gainerako irakasleak

   3. 60 (%20): ikasleak

   4. 33 (%11): administrazio eta zerbitzuetako langileak

2. – Goian aipatutako kidegoak, berriz, honakoek osatzen dituzte:

   1. Honako kidego hauetako irakasle funtzionario doktoreak: unibertsitateko katedradunak, unibertsitate eskolako katedradunak, unibertsitateko irakasle titularrak eta unibertsitate eskolako irakasle titularrak. Era berean, talde honetakoak izango dira aipatutako kidegoetako bitarteko irakasle doktoreak.

   2. Kidego hauetako irakasle funtzionario ez doktoreak: doktore titulua ez daukaten unibertsitate eskoletako irakasle katedradunak eta unibertsitate eskoletako irakasle titularrak; irakasle laguntzaileak, irakasle laguntzaile doktoreak eta irakasle elkartuak, administrazio edo lan kontratu bidez unibertsitateari lotuta daudenak; irakasle kontratatu doktoreak; irakasle emerituak; Ramón y Cajal Programaren bidez kontratatuak; eta aurreko paragrafoan zehaztu ez diren irakasle eta ikerlariak.

   3. Ikasleak, honako titulu ofizialen batean matrikulatuak: 1. 2. edo 3. zikloan; unibertsitateko berezko tituluetan; eta Giza Zientzietako unibertsitate tituluan. Hirugarren zikloko ikasletzat honakoak hartuko dira: doktoregoko programaren batean matrikula egina dutenak; ikertzeko gaitasuna aitortuta izanik eta tesi proiekturako matrikula egina izanik, ez dutenak tesiaren defentsa egin, horretarako epearen barruan egonda.

   4. Administrazio eta zerbitzuetako pertsonala: EHUn zerbitzuak betetzen ari diren funtzionarioak eta lan kontratuko langileak; beste administrazio publiko batzuetakoak izanik, indarreko legediari jarraiki EHUn zerbitzuak betetzen ari diren langileak; eta lanpostuen zerrendan ageri diren konfiantzazko langileak.

      2. artikulua

      1. – Irakasle eta ikertzaileek Klaustroan izango dituzten ordezkarien banaketa ikastegietako proportzio erlatiboaren araberakoa izango da, eta arduraldien haztapenaren araberakoa. Era berean, ikastegi bakoitzak ordezkari bat izango du Klaustroan, ikastegian nagusi den irakasleen kidegokoa.

      2. – Ikastegi bakoitzak ikasleen ordezkari bat izango du, gutxienez, Klaustroan. Gutxieneko hori behin izendaturik, gainerako ordezkarien kopurua ikastegien artean banatuko da, bakoitzak guztira daukan ikasle kopuruaren zuzeneko proportzioan. Giza Zientzietako unibertsitate tituluko ikasleek hauteskunde barrutia osatuko dute, eta ordezkari bakarra izango dute Klaustroan. Ikasleek Klaustroan izan behar dituzten ordezkariak hautatzeko gutxienez %5ek hartu beharko du parte hauteskundeetan.

      3. – Administrazio eta zerbitzuetako langileek Klaustroan izango dituzten ordezkarien banaketa sektore horrek campus bakoitzean daukan kide kopuruaren proportzio erlatiboan egingo da.

      4. – Arduraldien haztapena honetara egingo da:

         1. Arduraldi osoko irakasleak: puntu 1

         2. Arduraldi partzialeko irakasleak, sei eta bost orduko kontratua dutenak: 0,75 puntu

         3. Arduraldi murriztuko irakasleak, lau eta hiru orduko kontratua dutenak: 0,37 puntu

3. artikulua

   Klaustrorako ordezkariak sufragio unibertsal, libre, berdin, zuzen eta sekretuaz hautatuko dira.

4. artikulua

1. – Kidego bakoitzeko ordezkariak kidegokoek hautatuko dituzte euren baitako kideen artetik.

2. – Ordezkaria izatea norberari dagokion ezaugarria da eta ezin da beste inoren gain utzi. Honelako egoeretan utziko dio ordezkari batek ordezkari izateari:

   1. Hilez gero edo ezintasuna izanez gero.

   2. Hauteskundeak baliogabetuz gero.

   3. Agintaldia amaituz gero.

   4. Dimisioa aurkeztuz gero.

   5. EHUko kidea izateari utziz gero, edo hautatua izan zen ikastegiko edo kidegoko kidea izateari utziz gero.

   6. Bileretara behin eta berriro huts eginez gero, kasuan kasuko arautegiari jarraiki.

      5. artikulua

      1. – Errolda ixten den egunean Euskal Herriko Unibertsitatean lanean edo ikasten dauden eta dagokien hautesleen erroldan agertzen diren guztiak izan daitezke hautesle eta hautagai, 1.2. artikuluari jarraiki.

      2. – Hauteskundeetan botoa emateko edo hautagai izateko baldintzak hauteskundeetarako deian errolda ixteko zehaztutako egunean bete behar dira.

      3. – Hauteskundeetan irakasle edo ikertzaileek eta administrazio eta zerbitzuetako langileek ezin izango dute parte hartu eurenaz bestelako kidego batean. Zalantzarik balego, jarduera nagusia betetzen duen kidegoan emango du botoa.

      4. – Ez dira ez hautesle ez hautagai izango ikastegi atxikietako ikasleak, administrazioko langileak eta irakasleak.

      5. – Hautesleek dagokien hauteskunde barrutian emango dute botoa; dena dela, botoa aldez aurretik emateko eskubideari buruz zehaztutakoa ere izan beharko da kontuan.

      6. – Errolda itxi eta kidego bakoitzeko hautagaiak eta hautesleak zehaztea botazioa egin baino hilabete lehenago egingo da, onartzen den egutegiari jarraiki.

      7. – Errolda argitara emango da berori itxi eta gehienez ere 5 egunera.

      8. – Ikastegiko Hauteskunde Batzordeak erroldari egindako inpugnazioak ebatziko ditu. Inpugnaziook eta haien gaineko erabakiak Hauteskunde Batzorde Nagusiari bidaliko dizkio. Hauteskunde Batzorde Nagusia erroldak zuzen izateaz arduratuko da, eta akatsik edo hutsunerik antzemanez gero, zuzendu egingo ditu.

      6. artikulua

      1. – Hauteskunde Batzorde Nagusiak antolatu eta kontrolatuko du Klaustroko kideak hautatzeko prozesua, berak aldarrikatuko ditu emaitzak eta ebatziko ditu inpugnazioak.

      2. – Honakoak izango dira Hauteskunde Batzorde Nagusiko kideak: errektorea (batzordeburua izango da); idazkari nagusia; hauteskunde taldeetako kide bana, Gobernu Kontseiluko kideen artetik zozketaz aukeratuak. Zozketan talde bakoitzerako titularra eta bi ordezko aukeratuko dira. Zozketa horretarako, behin-behineko Gobernu Kontseiluko kide guzti-guztiak dagozkien taldeetan banatuko dira.

      3. – Baten bat klaustrokide izateko hautagai aurkeztuko balitz, zuzenean eragiten dioten gaietan parte ez hartzera behartuta egongo da azaroaren 26ko Herri Administrazioen Araubide Juridikoaren eta Administrazio Prozedura Erkidearen 30/1992 Legeko 28. artikuluan parte ez hartzeko aipatzen diren arrazoiengatik.

      4. – Hauteskunde Batzorde Nagusiak gehiengo soilaren bidez hartuko ditu erabakiak; berdinketa dagoenean batzordeburuaren botoak erabakiko du.

      5. – Hauteskunde Batzorde Nagusiaren egoitza Idazkaritza Nagusia izango da, eta eginkizunak egoki betetzeko behar dituen baliabide guztiak izango ditu uneoro.

      6. – Hauteskunde Batzorde Nagusiko buruari zuzendutako idazki eta dokumentu guztiak Unibertsitateko Erregistro Orokorrean aurkeztu beharko dira, erregistroak daukan ordutegiaren barruan.

      7. artikulua

      1. – Klaustrokideak aukeratzeko hauteskundeetan irakasle eta ikertzaileentzat (a eta b hauteskunde taldeak) hauteskunde barrutia ikastegia izango da.

      2. – Ikasleentzako hauteskunde barrutia ikastegia izango da. Doktoregoko eta berezko tituluetako ikasleen kasuan, programaren ardura daukan sailaren egoitzari dagokion ikastegia. Giza Zientzietako ikasleen kasuan, berriz, eskolak emateko erabiltzen den lekua.

      3. – Administrazio eta zerbitzuetako langileentzat (AZP) EHUko hiru campusak izango dira hauteskunde barrutia.

      8. artikulua

      1. – Ordezkariak aukeratzeko hauteskunde eguna behin zehaztuta, hauteskunde batzorde bana eratuko da hauteskunde barrutietan. Batzorde hori barrutiko hauteskunde talde bakoitzeko (1.2. artikuluan zehaztutako eran egongo dira banatuta taldeak) kide batez osatuta egongo da, ikastegiko batzarreko kideen artetik aukeratua. Batzorde burua dekano edo zuzendaria izango da, eta idazkaria, berriz, idazkari akademikoa.

      2. – Administrazio eta Zerbitzuetako Pertsonalak (AZP) campus bakoitzean izango duen hauteskunde batzordeko burua gerentea edo horrek eskuordetutako pertsona izango da, eta, horrez gain, bi kide izango ditu kasuan kasuko campusean talde horretako kideen artetik zozketaz aukeratuak.

      9. artikulua

      1. – Barruti bakoitzaren ezaugarriengatik komenigarri denean, hauteskunde batzordeek hauteskunde mahai bat baino gehiago egotea erabaki dezakete.

      2. – Hauteskunde mahai bakoitzak mahaiburu bat eta hiru mahaikide izango ditu. Edozelan ere, bi mahaiburu (titularra eta ordezkoa) eta sei mahaikide (3 titular eta 3 ordezko) izendatuko dira, behar bezala ordenatuta. Horiek guztiak barrutiko hautesleen artetik, eta, egoki denean, kasuan kasuko hauteskunde taldeetako kideen artetik, aukeratuko dira barrutiko Hauteskunde Batzordeak egindako zozketaren bidez. Ez da zozketan sartuko hautagai izateko onartutakorik.

      3. – Giza Zientzietako titulazioaren kasuan, Hauteskunde Mahairako zozketa Hauteskunde Batzorde Nagusiak egingo du.

      4. – Hauteskunde Mahaiko kidea izatea egokituz gero, nahitaezkoa da eginkizun hori betetzea, behar bezala egiaztatutako bidezko arrazoirik izan ezean. Horrelakoetan, idatzi bidez egin behar zaio uko izendapenari, idatzia hauteskunde batzordeko idazkariari zuzenduta eta izendapenerako jakinarazpenean zehaztutako epearen barruan.

      5. – Mahaia eratzean ez bertaratzeak erantzukizunak eskatzea ekar dezake, eta horrelako egoeratan, Hauteskunde Mahaiko buruak edo, hala egokituz gero, Hauteskunde Batzorde Nagusiko buruak hautesleen artetik berak nahi duena aukeratuko du.

      10. artikulua

      1. – Hauteskunde Mahaiaren zereginak izango dira botazioan buru izatea, ordena jagotea, prozesua garbia izan dadin zaintzea, hauteskundeen arauak bete daitezen arduratzea eta botoak zenbatzea.

      2. – Mahaiak botoen gehiengo soilaz hartuko ditu erabakiak. Hainbanaketa suertatuz gero, mahaiko buruaren kalitatezko botoak erabakiko du.

      3. – Hauteskunde prozesuan gorabehera larririk gertatuko balitz, mahaiko buruak Hauteskunde Batzorde Nagusiari jakinaraziko dio lehenbailehen, eta gainera horren berri jaso beharko du aktan.

      11. artikulua

      1. – Hala nahi duten hautagaiek ikuskari bat proposatu ahalko dute mahai bakoitzeko. Ikuskaria kasuan kasuko mahaiko hauteslea izan beharko da.

      2. – Ikuskariak izendatzeko eskariak Hauteskunde Batzorde Nagusiari bidali beharko zaizkio, hautagaiak behin betiko aldarrikatu eta hurrengo bi egunen barruan. Ikuskariak izendatzeko eskarian proposatu nahi diren ikuskarien izen-deiturak, helbidea eta telefonoa eman beharko dira, eta horrekin batera interesatuek sinatutako onarpen idatziak aurkeztu.

      3. – Hauteskunde Batzorde Nagusiak, baldintzak betetzen direla egiaztatu ondoren, bakoitzaren izendapena egingo du, bi kopiatan. Ikuskariak aleetako bat mahaiko buruari emango dio eta hark mahaia eratzeko aktari erantsiko.

      12. artikulua

      1. – Hautagai zerrenda itxi eta ordenatuak aurkeztuko dira kasuan kasuko hauteskunde batzordearen aurrean, hautagai guztiek sinatuak. Hautagai zerrendek ikastegi bakoitzean kasuan kasuko taldeari dagozkion postu guztiak bete ahal izango dituzte, edota kasuan kasuko campusean administrazio eta zerbitzuetako langileei dagozkien ordezkarien kopurua, eta zerrendetako kideen kopurua ez da inolaz ere ordezkarien gehieneko kopuruaren erdia baino txikiagoa izango. Hautagai zerrendetan ordezkoak ere egon ahal izango dira.

      2. – Hautagai zerrendak aurkezteko epea botazioa baino hamar egun lehenago amaituko da gutxienez. Hauteskunde barruti bakoitzeko hauteskunde batzordeak egiaztatu egin beharko du hautagai bakoitzak baldintzak betetzen dituela, egon daitezkeen inpugnazioak ebatziko ditu eta hiru eguneko epean, gehienez ere, hautagaiak aldarrikatuko ditu.

      3. – Hauteskunde batzordeek hautagai zerrendak eta barruti bakoitzari dagozkion xehetasunak argitaratuko dituzte leku egokietan.

      4. – Hautagai zerrendak aurkezteko idatzia EHUko Erregistro Orokorreko bulegoetan aurkeztu beharko da, Gobernu Kontseiluak onartuko duen egutegiari jarraiki.

      13. artikulua

          Hautagaiak behin-behinekoz aldarrikatuta, inpugnazioak aurkeztu ahal izango dira unibertsitateko Erregistro Orokorrean, hauteskundeen egutegian horretarako zehaztuko den epean. Hauteskunde Batzorde Nagusiak inpugnazioak ebatzi, hautagai zerrendak behin betiko aldarrikatu eta agindua emango du beroriek ikastegi bakoitzeko iragarki oholean argitaratzeko.

          Aldarrikatutako hautagai zerrendak ikusgai egongo dira gutxienez botazio egunera arte.

      14. artikulua

          Hautagai zerrendak behin betiko aldarrikatzen direnetik botaziorako 24 ordu falta diren arte, hala nahi duten hautagaiek hauteskunde kanpaina egin ahal izango dute.

          Hautagaiek kasuan kasuko hauteskunde batzordearekin batera adostuko dute propaganda zereginetarako egutegia. Ikasleen hautagai zerrenda bakoitzak eskola ordu bat izango du ikastegi bakoitzean bere programa azaltzeko. Hautagaiek lokal egoki bat izango dute horretarako eta eskolak eten egingo dira ordu horretan. Eten horretan, irakasleen hautagaiek hauteskunde kanpainako jarduerak egin ahal izango dituzte.

          Administrazio eta zerbitzuetako langileen hautagaiek lanaldi barruko ordubete izango dute, ordaindua eta errekuperatu beharrik gabekoa, ikastegi bakoitzeko edo irakaskuntzaz kanpoko atal bakoitzeko.

      15. artikulua

          Hauteskunde barruti bakoitzeko batzordeak egingo ditu boto txartel ofizialak. Boto txartelak kolore desberdinekoak izango dira kidego bakoitzerako.

      16. artikulua

      1. – Mahaiburua eta mahaikideak, titularrak zein ordezkoak, bozketa hasteko ordua baino ordu erdi lehenago bilduko dira bozketa lekuan, mahaia eratzeko eta dagozkien eginkizunak betetzeko.

      2. – Hauteskunde Mahaiko titularren bat ez bada bertaratu zehaztutako orduan, ordezkoak hartuko du haren lekua.

      3. – Mahaia eratzeko nahitaezkoa izango da mahaiburua eta bi mahaikide bertan izatea. Botazioa egin bitartean, gutxienez mahaiko bi kide egon beharko dira bertan. Mahaikideek eurek erabakiko dute mahaian egoteko txandak zelan antolatu.

      4. – Mahaiko zenbait kide bertaratu ez direlako ezinezkoa bada mahaia eratzea, bertan daudenek unean bertan emango diote egoeraren berri Hauteskunde Batzordeari, haren ustez hauteskundeak behar bezala egiteko egokien diren pertsonak aukera ditzan, edo ikastegiko dekano edo zuzendariaren esku utz dezan ardura hori.

      5. – Ikuskariak botazioa hasteko zehaztutako ordua baino 30 minutu lehenago bertaratu beharko dira. Mahaiburuak ikuskarien agiriak hartu eta mahaia eratzeko aktari erantsiko dizkio. Ikuskariak berandu badoaz eta heldu orduko mahaia eratzeko akta eginda badago, ezin izango dute prozesua ikuskatu.

      6. – Mahaia eratzeko akta mahaiburuak, mahaikideek eta ikuskariek bete beharko dute Hauteskunde Batzorde Nagusiak emandako eredua erabilita.

      17. artikulua

      1. – Botoa emateko ordutegia goizeko 10:00etan hasi eta arratsaldeko 19:00ak artekoa izango da, etenik egin gabe.

      2. – Euren burua identifikatzeko, hautesleek agiri argazkidun hauetako bat aurkeztu beharko dute: nortasun agiria, pasaportea, EHUko txartela edo gidabaimena.

      3. – Mahaiko buruak begiratuko du ea botoa ematera etorri den pertsona dagokion erroldan dagoen. Horren ostean, hautesleak boto txartela emango dio mahaiko buruari edo dagokion mahaikideari, eta berak boto kutxan sartuko du segituan.

      4. – Mahaiko kide batek botoa eman duten hautesleak markatuko ditu dagokion zerrendan, mahaiko buruak edo mahaikideak txartelak boto kutxan sartu ahala.

      5. – Botazioa amaitzeko ordua heltzean, mahaiko buruak botazioa amaitzera doala iragarriko du ozen, eta ez dio inori gehiago gelan sartzen utziko. Dena dela, barruan daudenetako batek artean botorik eman ez badu, utzi egingo dio botoa ematen. Hurren, ikuskariek eta mahaikideek emango dute botoa, nahi izanez gero.

      6. – Boto txartela aukeratzeko edo mahaiko buruari emateko ezintasunen bat daukatenek konfiantzako pertsona baten bidez egin ahalko dute.

      18. artikulua

      1. – Botazio egunean bere hauteskunde barrutian egoterik ez dutenei bertan parte hartzea errazteko asmoz, ikastegietako zuzendaritzek eta campusetako gerenteordeek botoa aldez aurretik ematea onartuko dute, botazio eguna baino lehenagoko hiru egun baliodunetan, behar den ziurtagiria emanda. Ikastegietan lan egiten duten administrazio eta zerbitzuetako langileek kasuan kasuko ikastegian eman ahal izango dute botoa aldez aurretik, AZPkoen Hauteskunde Batzordeak onartuko duen prozedurari jarraiki.

      2. – Boto horiek gutunazal ofizial itxian bidali beharko dira. Gutunazal itxi hori eta NANaren fotokopia bat beste gutunazal batean sartu beharko dira, dagokion mahaiburuari zuzendurik. Gutunazal horren kanpoaldean hauteslearen izen-abizenak eta zein taldetako kidea (arloa) den adierazi beharko da; hautesleak hegalean sinatu eta zinta itsasgarriarekin ondo itxiko du.

      3. – Behin botazioa amaitu eta gero, horrela emandako botoak boto kutxan sartuko dira, hauteslea erroldan agertzen dela egiaztatu ondoren. Hautesleren batek botoa aldez aurretik eman arren hauteskunde egunean ere eman badu, aurretik emandakoak balioa galduko du eta ez da kutxan sartuko.

      4. – Hautesleak berak eman behar du aldez aurretiko botoa.

      19. artikulua

      1. – Botazioa amaituta, botoak zenbatuko dira ekitaldi publikoan. Behin boto guztiak zenbatuta, mahaiak erreklamazioak ebatziko ditu.

      2. – Baliozko bototzat joko da boto txartel ofizialean emandakoa, hautagai zerrenda bakarra ageri duena, izena ere adierazita, zerrendak izenik balu.

      3. – Boto baliogabeak izango dira: oharren bat duten txarteletan emandako botoak eta izenen bat ezabatuta edo aldatuta dutenak; baliogabeak izango dira ere gutunazalean txartel desberdinak sartuta dituztenak, edo gutunazal gabe ontzian sartutakoak, gutunazala nahitaezkoa denetan.

      4. – Aktak behin sinaturik, boto kutxetatik ateratako boto txartelak suntsitu egingo dira, baliogabeko botoak dauzkatenak edo erreklamatuak izan direnak izan ezik. Horiek aktei erantsiko zaizkio, mahaikideek aktak behin sinatu ondoren.

      5. – Botoak zenbatzen amaitu ondoren eta balizko erreklamazioak behin ebatzita, mahaiko buruak emaitzak irakurriko ditu eta botazioaren akta egiteko prozesua gainbegiratuko du, Hauteskunde Batzorde Nagusiak mahaietako buruei emango dien ereduari jarraiki. Mahaiko kide guztiek sinatuko dute akta hori. Aktan honako datuok zehaztuko dira: hauteskunde barrutia, emandako boto kopurua, boto baliozkoak, baliogabeak eta zuriak, hautagai zerrenda bakoitzak lortutako botoak eta proposatutako ordezkarien izenak. Era berean, izandako erreklamazioak, erabakiak eta gorabeherak ere jasoko dira, halakorik egonez gero. Era berean, ordezkoak ere proposatuko dira, jasotako boto kopuruen araberako hurrenkeran, kidego bakoitzerako hautatuak izan diren pertsonak ordezkatzeko, horiek klaustrokideak izateari uzten diotenean.

      20. artikulua

          Mahaiek argitara emango dituzte emaitzak aktak sinatu bezain laster. Horretarako, aktak fotokopiatu eta ikastegietako iragarki oholetan eskegiko dituzte. Hala berean, emaitzen berri emango diote Hauteskunde Batzorde Nagusiari faxez.

      21. artikulua

          Boto gehien bildu dituzten zerrendetako kideak proposatuko dira ordezkariak izateko, hondar handienaren sistema proportzionala erabiliz.

          Hautetsiak aldarrikatzeko beharrezkoa izango da erroldan kidego bakoitzetik agertzen diren pertsonen %5ek ematea botoa dagokien barrutian.

      22. artikulua

          Behin-behineko emaitzak behin aldarrikaturik, aktaren kopia bat bidaliko zaio Hauteskunde Batzorde Nagusiari egun bi igaro baino lehen, eta epe bat irekiko da batzorde horren aurrean inpugnazio eta erreklamazioak egiteko.

          Edozein kidego eta barrutitako kideek aurkeztu ahal izango dituzte inpugnazioak.

      23. artikulua

          Hauteskunde Batzorde Nagusiak ebatziko ditu inpugnazioak eta berak aldarrikatuko ditu emaitzak. Inpugnazioak bost eguneko epean ebatziko ditu. Epe hori ezin izango da luzatu.

          Dena delako gorabeherengatik hauteskunde barruti batean hala komeni denean, Hauteskunde Batzorde Nagusiak hauteskunde prozesu berria irekiko du barruti horretan.

      24. artikulua

          Hautetsia izateko proposatua izan den hautagai batek arau hauetako 5. artikulua hausten duenean, klaustrokide izendatua izateko eskubidea galduko du, eta bere zerrendako hurrengo kide ez hautetsiak ordezkatuko du.

      25. artikulua

          Inpugnazioak ebatzi ondoren eta behin-behineko emaitzak —behar izanez gero— aldatu ostean, Hauteskunde Batzorde Nagusiak akta bat egingo du eta ikastegi guztietara bidaliko du astebeteko epean, unibertsitateko kide guztiak jakitun egon daitezen.

      26. artikulua

          Idazkari nagusiak agiria egingo dio hautetsi bakoitzari, hautetsiak behin betiko aldarrikatu eta hamabost eguneko epean, gehienez ere.

      27. artikulua

          Kide hautetsiek uko egin ahal izango diote izendapenari Klaustroko buruari aurkeztutako idatzi baten bidez. Dena dela, izendapenari uko egiteko epea Klaustroko bilera baino 10 egun lehenago amaituko da. Haren ordez zerrenda bereko lehen kide ez hautetsia izendatuko da, eta dagokion agiria emango zaio. Klaustrokide berriaren ikastegiari ordezkapen horren berri emango zaio.

Otsailaren 10a Errolda itxi

Otsailaren 13a Behin-behineko erroldak argitaratu

Otsailaren 17a, eguerdiko 12:00ak arte Behin-behineko erroldak inpugnatzeko epea

Otsailaren 20a Behin betiko erroldak argitaratu

Otsailaren 27a, eguerdiko 12:00ak arte Hautagai zerrendak aurkezteko epea

Martxoaren 1a Hautagai zerrendak behin-behinekoz aldarrikatu

Martxoaren 3a, eguerdiko 12:00ak arte Hautagai zerrendak behin-behinekoz inpugnatzeko epea

Martxoaren 4a Hautagai zerrendak behin betiko aldarrikatu

Martxoaren 24a Hauteskunde eguna

Martxoaren 25a Klaustrokideak behin-behinekoz aldarrikatu

Martxoaren 31, 10:00ak arte Klaustrokideak behin-behinekoz aldarrikatzeko epea

Apirilaren 5a Klaustrokideak behin betiko aldarrikatu

BOTOA ALDEZ AURRETIK EMATEKO EGUNAK: MARTXOAREN 18, 22 ETA 23a