Ongi etorri Legegunea atarira

Errektorea unibertsitateko kideek hautatuko dute, hautaketa zuzenaz eta sufragio unibertsal, libre eta sekretuaz. Errektore izateko hautagai izan ahalko dira UPV/EHUn jardunean dauden eta arduraldi osoa daukaten unibertsitateko katedradunen kidegoko irakasle funtzionarioak.

1. Hautesle izango dira Euskal Herriko Unibertsitatean zerbitzuak betetzen dituzten guztiek, beti ere hauteskundeetarako deian errolda ixteko zehaztutako egunean jardunean badaude; era berean, ikasleak ere izango dira hautesle hurrengo artikuluan zehaztutako taldeetako erroldaren batean agertzen baldin badira.

2. Hauteskundeetan botoa emateko edo hautagai izateko baldintzak hauteskundeetarako deian errolda ixteko zehaztutako egunean bete behar dira.

1. Errektorea hautatzeko hauteskundeetarako, unibertsitateko kideak sailkapen honen arabera egongo dira banatuta:

   3. Irakasle funtzionario doktoreak, hau da: unibertsitateko katedradunen kidegoetakoak; unibertsitate eskoletako katedradunen kidegoetakoak; unibertsitateko irakasle titularrak; eta unibertsitate eskoletako irakasle titularrak, baldin eta doktore titulua badute. Era berean, talde honetakoak izango dira aipatutako kidegoetako bitarteko irakasle doktoreak.

   4. Irakasle funtzionario ez doktoreak: doktore titulua ez daukaten unibertsitate eskoletako irakasle katedradunak eta unibertsitate eskoletako irakasle titularrak; irakasle laguntzaileak, irakasle laguntzaile doktoreak eta irakasle elkartuak, administrazio edo lan kontratu bidez unibertsitateari lotuta daudenak; irakasle kontratatu doktoreak; irakasle emerituak; Ramón y Cajal Programaren bidez kontratatuak; eta aurreko paragrafoan zehaztu ez diren irakasle eta ikerlariak.

   5. Ikasleak, honako titulu ofizialen batean matrikulatuak: 1., 2. edo 3. zikloan; unibertsitateko berezko tituluetan; eta Giza Zientzietako unibertsitate tituluan. Hirugarren zikloko ikasletzat honakoak hartuko dira: doktoregoko programaren batean matrikula egina dutenak; ikertzeko gaitasuna aitortuta izanik eta tesi proiekturako matrikula egina izanik, ez dutenak tesiaren defentsa egin, horretarako epearen barruan egonda.

   3. Administrazio eta zerbitzuetako pertsonala: EHUn zerbitzuak betetzen ari diren funtzionarioak eta lan kontratuko langileak; beste administrazio publiko batzuetakoak izanik, indarreko legediari jarraiki EHUn zerbitzuak betetzen ari diren langileak; eta lanpostuen zerrendan ageri diren konfiantzazko langileak.

2. Irakaslea edo administrazio eta zerbitzuetako pertsonala era berean ikasle ere bada, edo administrazio eta zerbitzuetako pertsonala era berean irakasle ere bada, irakasleen taldean edo administrazio eta zerbitzuetako pertsonalaren taldean baino ezin izango du eman botoa, kasuan-kasuan dagokionaren arabera. Zalantzarik balego, jarduera nagusia betetzen duen taldean emango du botoa.

3. Ez dira hautesle izango atxikitako zentroetako ikasleak, administrazioko pertsonala eta irakasleak.

4. Hautesleek kasuan kasuko hauteskunde mahaian emango dute botoa; dena dela, botoa aldez aurretik emateko eskubideari buruz zehaztutakoa ere izan beharko da kontuan.

1. Errektorea aukeratzeko hauteskunde eguna behin zehaztuta, hauteskunde batzorde bana eratuko da ikastegietan. Batzorde hori barrutiko hauteskunde talde bakoitzeko (4.1. artikuluan zehaztutako eran egongo dira banatuta taldeak) kide batez osatuta egongo da, ikastegiko batzarreko kideen artetik aukeratua. Batzorde burua dekano edo zuzendaria izango da, eta idazkaria, berriz, idazkari akademikoa.

2. Administrazio eta Zerbitzuetako Pertsonalak (AZP) campus bakoitzean izango duen hauteskunde batzordeko burua gerentea edo horrek eskuordetutako pertsona izango da, eta adineko mahai batez osatuta egongo da.

Hauteskunde Batzorde Nagusiaren eskumenak dira:

10. behin betiko errolda onartzea;

11. hautagaiak aldarrikatzea 16. artikuluan zehaztutakoari jarraituz;

13. ikastegietako mahaien kokalekua onartzea, ikastegiko dekano edo zuzendariaren proposamenari jarraituz;

14. hauteskunde mahaiek egindako galderak ebaztea;

16. errektore izateko hautagai hautetsia aldarrikatzea;

17. hauteskunde mahaiko botazioa baliogabetzea, eta beste hauteskunde prozesu bat irekitzea 24. artikuluan zehaztutakoari jarraituz.

18. kexak, erreklamazioak eta errekurtsoak ebaztea, araudi honi jarraituz;

19. Gobernu Kontseiluak zehaztu ez arren, hauteskunde prozesua behar bezala betetzeko beharrezko diren gainontzeko jarduketak;

20. hauteskunde mahaiko kide izateari uko egiteko aurkeztutako arrazoiak aztertzea.

21. hautagaien kanpainako gastuak gainbegiratzea.

1. Idazkaritza Nagusiak hautesleen behin-behineko errolda osatuko du, pertsonaleko zerbitzuek eta akademi gestiokoek emandako zerrendak oinarri hartuta. Ondoren, errolda argitaratzeko agindua emango du eta Errektoregoko iragarki oholean, campusetako errektoreordetzakoetan eta ikastegi guztietakoan jarri beharko da Gobernu Kontseiluak hauteskundeetarako onartutako egutegiaren arabera. EHUko moderatzailearen bidez ere emango da jakitera.

2. Behin-behineko erroldari buruzko erreklamazioak Hauteskunde Batzorde Nagusiari zuzendu beharko zaizkio, hauteskundeetarako egutegian jasotako epearen barruan; erreklamaziook Unibertsitateko Erregistro Orokorrean aurkeztu beharko dira. Hauteskunde Batzorde Nagusiak lau egun baliodun izango ditu erreklamazioak ebazteko, eta, ondoren, behin betiko errolda onartu eta argitaratzeko agindua emango du.

1. Errektorea hautatzeko hauteskundeetan, irakasle eta ikertzaileentzat (a eta b hauteskunde taldeak) hauteskunde barrutia ikastegia izango da.

2. Ikasleentzako hauteskunde barrutia ikastegia izango da. Doktoregoko eta berezko tituluetako ikasleen kasuan, programaren ardura daukan sailaren egoitzari dagokion ikastegia. Giza Zientzietako ikasleen kasuan, berriz, eskolak emateko erabiltzen den lekua.

3. Administrazio eta Zerbitzuetako Pertsonalarentzat (AZP) EHUko hiru campusak izango dira hauteskunde barrutia.

1. Unibertsitateko talde bakoitzeko eratu behar den hauteskunde mahai kopurua Hauteskunde Batzorde Nagusiak zehaztuko du.

2. Hauteskunde mahai bakoitzak mahaiburu bat eta hiru mahaikide izango ditu. Edozelan ere, bi mahaiburu (titularra eta ordezkoa) eta sei mahaikide (3 titular eta 3 ordezko) izendatuko dira, behar bezala ordenatuta. Horiek guztiak barrutiko hautesleen artetik, eta, egoki denean, kasuan kasuko hauteskunde taldeetako kideen artetik, aukeratuko dira barrutiko Hauteskunde Batzordeak egindako zozketaren bidez. Ez da zozketan sartuko hautagai izateko onartutakorik.

3. Giza Zientzietako titulazioaren kasuan, hauteskunde mahairako zozketa Hauteskunde Batzorde Nagusiak egingo du.

4. Hauteskunde Mahaiko kide izatea egokituz gero, nahitaezkoa da eginkizun hori betetzea, behar bezala egiaztatutako bidezko arrazoirik izan ezean. Horrelakoetan, idatzi bidez egin beharko zaio uko izendapenari, idatzia hauteskunde batzordeko idazkariari zuzenduta eta izendapenerako jakinarazpenean zehaztutako epearen barruan.

5. Mahaia eratzean ez bertaratzeak erantzukizunak eskatzea ekar dezake, eta horrelako egoeratan, Hauteskunde Mahaiko buruak edo, hala egokituz gero, Hauteskunde Batzorde Nagusiko buruak, hautesleen artetik berak nahi duena aukeratuko du.

6. Hauteskunde Mahaiaren zereginak izango dira botazioaren lekuko izatea, ordena jagotea, prozesua garbia izan dadin zaintzea, hauteskundeen arauak bete daitezen arduratzea eta botoak zenbatzea.

1. Mahaiburua eta mahaikideak, titularrak zein ordezkoak, botazioa hasteko ordua baino ordubete lehenago bilduko dira botazio lekuan, mahaia eratzeko eta dagozkien eginkizunak betetzeko.

2. Hauteskunde Mahaiko titularren bat ez bada bertaratu zehaztutako orduan, ordezkoak hartuko du haren lekua.

3. Mahaia eratzeko nahitaezkoa izango da mahaiburua eta bi mahaikide bertan izatea. Botazioa egin bitartean, gutxienez mahaiko bi kide egon beharko dira bertan.

4. Mahaiko zenbait kide bertaratu ez direlako ezinezkoa bada mahaia eratzea, bertan daudenek unean bertan emango diote egoeraren berri Hauteskunde Batzordeari, haren ustez egokien diren pertsonak aukera ditzan mahaia eratzeko, edo ikastegiko dekano edo zuzendariaren esku utz dezan ardura hori.

5. Ikuskariak botazioa hasteko zehaztutako ordua baino 30 minutu lehenago bertaratu beharko dira. Mahaiburuak ikuskarien agiriak hartu eta mahaia eratzeko aktari erantsiko dizkio. Ikuskariak berandu badoaz eta heldu orduko mahaia eratzeko akta eginda badago, ezin izango dute prozesua ikuskatu.

6. Mahaia eratzeko akta mahaiburuak, mahaikideek eta ikuskariek bete beharko dute Hauteskunde Batzorde Nagusiak emandako eredua erabilita.

1. Mahaiak botoen gehiengo soilaz hartuko ditu erabakiak, eta berdinketarik egonez gero, mahaiburuaren botoak erabakiko du.

2. Hauteskunde prozesuan gorabehera larririk gertatuz gero, mahaiburuak Hauteskunde Batzorde Nagusiari jakinaraziko dio lehenbailehen, eta, gainera, horren berri jaso beharko du aktan.

1. Hala nahi duten hautagaiek ikuskari bat proposatu ahalko dute mahai bakoitzeko. Ikuskaria kasuan kasuko mahaiko hauteslea izan beharko da.

2. Ikuskariak izendatzeko eskariak Hauteskunde Batzorde Nagusiari bidali beharko zaizkio, hautagaiak behin betiko aldarrikatu eta hurrengo bi egunen barruan. Ikuskariak izendatzeko eskarian proposatu nahi diren ikuskarien izen-deiturak, helbidea eta telefonoa eman beharko dira, eta horrekin batera interesatuek sinatutako onarpen idatziak aurkeztu.

3. Hauteskunde Batzorde Nagusiak, baldintzak betetzen direla egiaztatu ondoren, bakoitzaren izendapena egingo du, bi kopiatan. Ikuskariak aleetako bat mahaiko buruari emango dio eta hark mahaia eratzeko aktari erantsi.

1. Hautagaitzak hautagaiak berak sinatutako idatzi bidez aurkeztu beharko dira, hautagaiaren izen-abizenak adierazita eta Hauteskunde Batzorde Nagusiari zuzenduta.

2. Hautagaiek hautagai izateko lege xedapenetan jasotako baldintza guztiak bete beharko dituzte, horien artean, klaustrokideen %10ek sinatutako bermea.

3. Errektore izateko hautagaiek programa eta gobernu taldearen egitura eta osaera, zehaztuta nortzuk izango diren errektoreordetza gehienen eta Idazkaritza Nagusiko karguen ardura izango dutenak.

4. Hautagai zerrendak aurkezteko idatzia EHUko Erregistro Orokorreko bulegoetan aurkeztu beharko da, Gobernu Kontseiluak onartuko duen egutegiari jarraiki.

5. Hautagaitza bertan behera utzi nahi izanez gero, Hauteskunde Batzorde Nagusiari zuzendutako idatzia aurkeztu beharko da Erregistro Nagusian, botoa aldez aurretik emateko zehaztutako epea bukatu baino gutxienez 24 ordu lehenago.

Hauteskunde Batzorde Nagusiak, hautagaiek baldintza guztiak betetzen dituztela behin egiaztatuta, hautagaien behin-behineko zerrendak aldarrikatuko ditu, Gobernu Kontseiluak onartutako egutegiari jarraituz. Hautagaiak behin-behinekoz aldarrikatuta, inpugnazioak aurkeztu ahal izango dira unibertsitateko Erregistro Orokorrean, hauteskundeen egutegian horretarako zehaztuko den epean. Hauteskunde Batzorde Nagusiak inpugnazioak ebatzi, hautagai zerrendak behin betiko aldarrikatu eta agindua emango du beroriek ikastegi bakoitzeko iragarki oholean, bai eta iragarki ohol informatikoaren bidez ere, argitaratzeko.

Aldarrikatutako hautagai zerrendak ikusgai egongo dira gutxienez botazio egunera arte.

1. Hautagai zerrendak behin betiko aldarrikatzen direnetik botaziorako 24 ordu falta diren arte, hala nahi duten hautagaiek hauteskunde kanpaina egin ahal izango dute.

2. EHUko Estatutuetako 249.2. artikuluan jasotakoa betetzeko, Unibertsitateak (zerbitzu nagusien kasuan Gerentziaren bidez, eta ikastegien kasuan dekano eta zuzendarien bidez) hauteskundeetako ekintzak egiteko behar dituzten lokalak utziko dizkie errektore izateko hautagaiei, horretarako eskaririk eginez gero. Edozelan ere, hautagai bakoitzak goiz edo arratsalde batez baino ezin izango du erabili ikastegi bakoitzeko gradu aretoa edo areto nagusia.

3. Ikastegi guztietan iragarki ohol bereziak jarriko dira hauteskundeetako propagandarako.

4. Hauteskunde sasoian, webgunean ere izango da txoko bat hauteskundeei buruzko gorabeherak iragartzeko. Iragarki ohol horretara erakundeak berak edo hautagaiek baino ez dute izango sarbiderik. Hautagaiek edo berariaz izendatutako kideek gainbegiratuko dituzte gune horretan jarriko diren iragarkiak, eta sarrera mugatua izango da (errektore izateko hautagaiek baino ezin izango dituzte jarri iragarkiak). Botoa eskatzeko ezin izango da erabili erakundeak sareko komunikazioetarako daukan gainontzeko baliabiderik. Erabiliz gero, hautagai horrek debekatuta izango du EHUk hauteskundeetako kanpaina egiteko jarri dituen iragarki oholak erabiltzea kanpainak irauten duen bitartean.

5. Hautagaiek hautesle zerrenda osoaren kopia bat izateko eskubidea izango dute. Hautagaiei ez zaie aldez aurretik boto txartelik emango botazio eguna baino lehen banatzeko.

6. Errektore izateko hautagaiek "pdf"” formatuan aurkeztu beharko dituzte programak, eta nahi izanez gero, bi hizkuntzetan; horrelakoetan, aparteko bi dokumentu osatu beharko dira, bata gaztelaniaz eta bestea, euskaraz (www.ehu.es/elecciones; www.ehu.es/hauteskundeak).

7. Errektore izateko hautagaiek beren programako oinarrizko puntuen berri eman dezaten, Unibertsitateak gehienez ere 10.000 euroko diru laguntza emango dio bakoitzari; laguntza jaso ahal izateko, justifikatu egin beharko da egindako gastua. Hautagaiek gehienez ere kopuru hori gastatu ahal izango dute kanpainan, eta, debekatuta egongo da erakundearen fondoak, kargu akademikoei esleituak, erabiltzea kanpairako.

8. Kanpaina ezin izango da finantzatu kanpoko erakundeen bidez, eta propagandarako onartuko den ikur bakarra Unibertsitatekoa izango da.

9. Kasuan kasuko hauteskunde batzordearekin ados jarrita, ikastegi bakoitzeko ikasle kontseiluak, Unibertsitatekoarekin batera, ikastegi bakoitzean eskola ordu bat izango du bere zereginak betetzeko eta hauteskundeen arrazoia eta horien garrantzia azaltzeko. Ordu horretan ez da eskola jarduerarik egingo eta gela egoki bat izango dute zeregin hori betetzeko. Ezin izango dute, inolaz ere, tarte hori erabili hauteskunde kanpaina egiteko, ez eta hautagai baten alde egiteko ere.

10. Errektoreak Unibertsitateko Klaustrorako ezohiko deiaegingo du, hautagaiek beren programak aurkeztu eta eztabaida ditzaten. Klaustrokideek hautagaientzako galderak prestatu ahal izango dituzte 20 klaustrokideren sinaduren babesarekin; galderok Klaustroa baino gutxienez 48 ordu lehenago aurkeztu beharko dituzte.

11. Hautagai guztiek baldintza berberetan egin dezaten hauteskunde kanpaina, errektore kargurako hautagaiak irakasle eta ikerlari legez dituzten eginkizunetatik libre egongo dira, hautagai zerrendak behin betiko aldarrikatzen diren unetik hasi eta lehenengo bozketa egin arte; bigarren txanda egin behar izanez gero, bigarren txanda horretara doazen hautagaiak bigarren bozketa egin arte egongo dira eginkizunetatik libre. Kasuan kasuko sailak eskolak behar bezala emateko beharrezko diren neurriak hartuko ditu.

1. Botazio egunean bere hauteskunde barrutian egoterik ez dutenei bertan parte hartzea errazteko asmoz, ikastegietako zuzendaritzek eta campusetako gerenteordeek botoa aldez aurretik ematea onartuko dute, botazio eguna baino lehenagoko hiru egun baliodunetan, behar den ziurtagiria emanda. Ikastegietan lan egiten duten administrazio eta zerbitzuetako langileek kasuan kasuko ikastegian eman ahal izango dute botoa aldez aurretik, AZPkoen Hauteskunde Batzordeak onartuko duen prozedurari jarraiki.

2. Boto horiek gutunazal ofizial itxian bidali beharko dira. Gutunazal itxi hori eta NANaren fotokopia bat beste gutunazal batean sartu beharko dira, dagokion mahaiburuari zuzendurik. Gutunazal horren kanpoaldean hauteslearen izen-abizenak eta zein taldetako kidea (arloa) den adierazi beharko da; hautesleak hegalean sinatu eta zinta itsasgarriarekin ondo itxiko du.

3. Behin botazioa amaitu eta gero, horrela emandako botoak boto kutxan sartuko dira, hauteslea erroldan agertzen dela egiaztatu ondoren. Hautesleren batek botoa aldez aurretik eman arren hauteskunde egunean ere eman badu, aldez aurretik emandako botoak balioa galduko du eta ez da kutxan sartuko.

4. Hautesleak berak eman behar du aldez aurretiko botoa.

5. Errektorea hautatzeko bigarren txanda egin behar izanez gero, aldez aurretiko botoa botazio egunaren aurreko bi lanegunetan eman ahal izango da.

1. Hauteskunde Batzorde Nagusiak akta hartu ondoren, boto guztiak zenbatuko ditu botazio egunaren hurrengo bi egunetan. Era berean, aktak aztertuko ditu eta egindako erreklamazio eta izandako gorabeherei buruzko erabakia hartuko du aktan jasotakoa kontuan hartuta.

2. Errektorea hautatzeko hauteskundeetako botoa haztatua izango da, Unibertsitateko talde banaketaren araberakoa. Taldeak eta bakoitzari dagozkion ehunekoak honakoak dira:

   1. A taldea: unibertsitateko irakasleen kidegoetako funtzionario doktoreak; %51

   2. B taldea: bestelako irakasle eta ikertzaileak; %18

   3. C taldea: ikasleak; %20

   4. D taldea: administrazio eta zerbitzuetako langileak; %11

      Botoen haztapena egiteko hautagai zerrendei emandako baliozko botoak baino ez dira kontuan izango. Artikulu honen ondorioetarako, baliozko botoak hautagai bakar bat markatuta dutenak izango dira. Beraz, ez dira baliozko bototzat hartuko ez boto zuriak ez boto baliogabeak.

      Zenbaketaren akta egin ondoren, Hauteskunde Batzorde Nagusiak hautatutako hautagaia aldarrikatuko du behin-behinekoz.

3. Baliozko botoen haztapena Hauteskunde Batzorde Nagusiak egingo du. Botoen haztapenari dagokion koefizientea lortzeko, zatiketa egingo da: 2. puntuaren arabera talde bakoitzari dagokion ehunekoa zati hautagai zerrenda bakoitzari emandako baliozko botoen kopuru osoa. Hauteskunde Batzorde Nagusiak koefiziente hori ezarriko die hautagai zerrenda bakoitzak talde bakoitzean lortutako botoei, ondorengo puntuan adierazitako irizpideei jarraituz.

4. Eragiketak egiteko, ondorengo formula eta eranskineko adibidea hartu behar dira kontuan. Gehiengoa osoa izango da boto haztatuen %50 baino gehiago lortu bada.

   Formula aplikatzeko irizpideak:

   Sa A taldea: unibertsitateko irakasleen kidegoetako funtzionario doktoreak

   Sb B taldea: bestelako irakasle eta ikertzaileak

   Sc C taldea: ikasleak

   Sd D taldea: administrazio eta zerbitzuetako langileak

   Pr Talde bakoitzari dagokion ehunekoa (artikulu honetako 2. puntuan adierazitakoak)

   Vv Hautagai zerrenda bakoitzak talde bakoitzeko lortutako baliozko botoak

   Cp Talde bakoitzaren haztapen koefizientea

   V1 1. hautagaiak lortutako boto kopurua

   V2 2. hautagaiak lortutako boto kopurua

   V3 3. hautagaiak lortutako boto kopurua

   C1 1. hautagaiak lortutako boto haztatuen %

   C2 2. hautagaiak lortutako boto haztatuen %

   C3 3. hautagaiak lortutako boto haztatuen %

   Talde bakoitzean hautagai bakoitzak lortu duen boto haztatua kalkulatzeko formula:

   Pr

   Cp = ––––, Ci = Cp x Vi i= 1, 2, 3, ...

   Vv

   Hautagai bakoitzak guztira lortutako boto haztatuak hautagai bakoitzak talde bakoitzean lortutako botoen batura izango da.

1. Lehenengo txandan errektore aldarrikatuko da baliozko botoen erdiak baino gehiago biltzen dituen hautagaia, aurreko zenbakiak adierazitako haztapenak behin aplikatuta. Inork lortuko ez balu boto kopuru hori, bigarren botazioa egingo da, baina horretan bakarrik lehiatu ahal izango dira lehen botazioan boto gehien lortu dituzten hautagai biak, lehen aipatutako haztapenak kontuan hartuta. Bigarren txandan botoen gehiengo soila lortzen duen hautagaia aldarrikatuko da errektore, botoen haztapena egin ondoren. Bigarren txanda lehenengo txandako emaitzak argitaratu eta gehienez 10 egunera egingo da.

2. Errektorea izateko hautagai bakarra balego, lehen botazioa baino ez da egingo. Botazio horretan unibertsitateko kideek alde, kontra edo zuri eman ahalko dute botoa. Hautagai bakar hori errektore aldarrikatuko da, baldin eta emandako baliozko botoetatik kontrako baino aldeko boto gehiago biltzen baditu, 23. artikuluko 2. puntuan zehazten diren haztapenak behin aplikatuta.

3. Hasiera batean hautagai bat baino gehiago egon arren hauteskunde egunean hautagai bakarra balego gainontzeko hautagaitzak bertan behera utzi dituztelako, txanda bakarra egingo da 2. paragrafoan zehaztutakoari jarraituz.

4. Hautagai hautetsia behin-behinekoz aldarrikatzen denean, erreklamazioak jarri ahal izango dira aldarrikapena egin eta hurrengo bi egunetan. Hauteskunde Batzorde Nagusiak bi eguneko epea izango du (erreklamazioak aurkezteko epea bukatzen denetik kontatzen hasita) erreklamazioak ebazteko, eta, ondoren, behin betiko aldarrikatuko du nor den hautetsia.

5. Hautagai hautetsia behin betiko aldarrikatzearen kontra errekurtsoa jar dakioke errektoreari hiru eguneko epean, eta hark bost eguneko epea izango du errekurtsoa ebazteko. Epe hori igarota ez badu horren gaineko erabakirik ematen, erreklamazioa ez dela onartu ulertu beharko da eta administrazioarekiko auzi-errekurtsoa jarri ahal izango du erreklamazio egileak.

6. Errektore hautetsia behin betiko aldarrikatu aurretik, Hauteskunde Batzorde Nagusiak baliogabetu egin ahalko du mahai bateko edo zenbaitzuetako botazioa, baldin eta botazioaren emaitzan eragina izan dezakeen akatsik egon bada. Horrelakoetan, berriro egingo da botazioa ahalik eta arinen.

7. Hauteskundeetarako deia egin eta hautagairik ez badago, edo aurkeztutako bakarrak ez badu hautetsi izateko behar besteko gehiengorik lortu, errektoreak jardunean jarraituko du, eta beste hauteskunde batzuetarako deia egingo du, gehienez ere hogeita hamar eguneko epean.

Araudi honetako 24.1. artikuluan zehaztutako egoeretan, hauteskunde mahaiak lehenengo txandako berak izango dira. Botazio hau aurreko artikuluetan jasotakoari jarraituz egingo da, beti ere kasu honetarako aplikagarri badira.

1. Botazioa hasi aurretik, mahaiburuak -mahaikideak eta behar bezala akreditatutako ikuskariak aurrean direla- boto kutxako gailu elektronikoa piztu eta kutxa irekitzeko kontrol txartela sartuko du kutxa pertsonalizatzeko. Kutxaren gailu elektronikoak hauteskunde mahaiko datuak eta hautagai zerrendak zuzenak direla egiaztatuko du. Era berean, egiaztatu egingo dute boto kutxaren pantailan hautagai zerrenda bakoitzeko botoak, boto zuriak eta baliozko botoak eta botoa emandakoen kopurua zeroan daudela.

2. Ondoren, txartelak gorde behar dituen kutxatila hutsik eta ondo itxita dagoela eta egiaztapenerako gailua behar bezala dabilela egiaztatuko dute.

3. Botazioa hasi aurretik ezinezkoa bada aurreko 1 puntuan boto kutxa elektronikoa irekitzeko adierazitakoa betetzea kutxa ondo ez dabilelako, mahaiburuak, hauteskunde barrutian material elektronikoaren ardura daukanarekin hitz egin, eta, egoki iritziz gero, matxuratutako boto kutxa elektronikoa kendu eta beste bat jarriko du. Horrelakorik gertatzekotan, mahaiburuak gertatutakoa jasota utziko du 20. artikuluan zehaztutako aktan, eta Hauteskunde Batzorde Nagusiari jakinaraziko dio.

4. Aurreko paragrafoan zehaztutako prozedura boto kutxa elektronikoaren funtzionamenduan gorabeherarik dagoenerako da, dena delako gorabehera botazioa egin bitartean edo hauteskunde mahaietan botoak zenbatzen diren bitartean gertatzen denerako, hain zuzen ere.

Hautesleak boto elektronikorako txartela, behar bezala itxita, eskura emango dio mahaiburuari, eta hark boto kutxaren gailu elektronikoko irakurgailuan sartuko du. Gailu elektronikoak txartela irakurri, eta onartu edo atzera botako du. Onartuz gero, boto kutxa elektronikoaren zirrikitua ireki egingo da, eta mahaiburuak, jendaurrean, "botoa ematen du"” edo "vota"” esan eta kutxan sartuko du boto txartela.

Jarrian, itxi egingo da boto kutxa elektronikoko zirrikitua, eta hautesle kopurua gehitu egingo da mahaiko boto kutxatilaren pantailan.

1. Boto kutxako gailu elektronikoak boto txartela onartzen ez duenetan, mahaiburuak hautesleari txartela itzuli eta beste bat hartzeko eskatuko dio.

2. Mahaiburuak egiaztatu egin beharko du hautesleak ematen dion boto txartel itxiaren kanpoko aldea ez dagoela aldatuta: ez daukala ezer idatzirik edo botoa zein eratakoa den erakutsiko duen ikurrik edo txartelak berak jatorriz ez daukan bestelakorik. Aldatuta badago, mahaiburuak ez du onartuko txartela, eta beste bat hartzeko eskatuko dio hautesleari.

3. Hautesleak boto txartela itxi barik ematen badio mahaiburuari, hark ixteko eskatuko dio hautesleari, itxi ondoren boto kutxa elektronikoaren irakurgailuan sartu ahal izateko.

4. Botoa emateko prozesuan mahaiburuak hautesleren batek asmo txarrez berriro ere botoa eman nahi duela ikusiz gero, neurri egokiak hartuko ditu botazio prozesuarekin aurrera egiteko eta arazoak saihesteko.

5. Boto emateko prozesuan kutxa guztiz bete eta posible ez bada boto gehiago sartzea, mahaiko buruak ezaugarri bereko beste boto kutxa huts bat jarriko du. Mahaiburuak gorabehera horren berri eman beharko du 20. artikuluan zehaztutako aktan, eta Hauteskunde Batzorde Nagusiari jakinaraziko dio zer erabaki duten.

6. Boto elektronikoa emateko prozesua abian dela mahaiburuak boto kutxa elektronikoak ez duela zuzen funtzionatzen ikusiz gero, agindua emango du botoa eskuz sartzeko kutxan, eta kendu egingo dute matxuratutako gailu elektronikoa. Era berean, mahaiburuak mantenimenduko arduradunari eskatuko dio beste boto kutxa elektroniko bat ekartzeko (boto kutxa elektronikoa osorik, botorako kutxatila eta guzti). Boto kutxa elektroniko berria hartu ondoren, ireki eta martxan jarriko du, eta mahaiburuak, lehengo boto kutxa zigilatu eta mahaiaren zaintzapean utzi ostean, aurrerantzean botoa modu elektronikoan emateko agindua emango du.

7. Boto kutxa zigilatuko botoak kutxa horretatik atera eta kutxa berrian sartu beharko dira. Hauteskunde mahaiak erabakiko du, ikuskariak aurrean direla, hori noiz egin: botazio prozesuan zehar edo amaieran. Mahaiburuak gorabehera horren berri eman beharko du 20. artikuluan zehaztutako aktan, eta Hauteskunde Batzorde Nagusiari jakinaraziko dio zer erabaki duten.

8. Matxuratutako gailu elektronikoa zigilatu egingo du mahaiburuak, eta Hauteskunde Batzorde Nagusiari jakinaraziko dio, gailu hori mahaitik kendu eta gordetako datu guztiak ezaba ditzaten.

9. Mahaiburuak, aurreko paragrafoetan zehaztutako gaien baten inguruko erabakirik hartu baino lehen, aholkua eskatuko die hauteskunde barrutian material elektronikoaren mantenimenduaren ardura dutenei.

Boto kutxa elektronikoko gailu elektronikoak ez badu onartzen aldez aurretik emandako botoaren txartela, edo aldez aurretik emandako botoaren gutunazala irekitzean mahaiak boto txartel bat baino gehiago dagoela ikusten badu, mahaiak, hauteslearen nortasuna isilpean gortzeko xedez, ez du kutxan sartuko boto hori: gainontzeko agiriekin batera Hauteskunde Batzorde Nagusiari bidaliko dio, eta 20. artikuluan adierazitako aktan jasota utziko ditu bai gertaera, bai gertaerako arrazoiak ere.

Halaber, aldez aurretik emandako botoaren txartelak kanpoko aldean gorabeherak dituela ikusiz gero, mahaiak ez du kutxan sartuko eta Hauteskunde Batzorde Nagusiari bidaliko dio.

1. Botazioa behin bukatuta, mahaiburuak kutxa ixteko kontrol txartela sartuko du gailu elektronikoan, eta, horrela, kutxa ez erabilgarri egongo da. Jarraian, mahaiko boto zenbaketa elektronikoari ekingo zaio.

2. Mahaiburuak ozen irakurriko ditu boto kutxaren pantailan agertuko diren zenbaketa elektronikoko emaitzak, eta, irakurri ere, honako guztiak irakurriko ditu:

   4. hauteskunde talde bakoitzeko hautesle kopurua

   5. baliozko botoen kopurua

   6. boto zurien kopurua

   7. hautagai zerrenda bakoitzeko baliozko botoen kopurua

3. Ostean, mahaiburuak galdetuko du zenbaketa elektronikoko emaitzaren kontra protestarik edo erreklamaziorik dagoen. Horrelakorik ez badago edo mahaiak, gehiengo osoz, ez onartzea erabakitzen badu, 20. artikuluan zehaztutako akta beteko du, honakoak jasota utzita: hauteskunde mahaiko hautesle zerrendan agertzen den hautesle kopurua; eta boto kutxako pantailan agertzen diren datuak, aurreko paragrafoan adierazitakoak. Amaitzeko, mahaiburuak, mahaikideek eta ikuskariek akta sinatuko dute.

4. Hauteskundeetako emaitzak behin-behinekoz argitaratzeko xedez, emaitzak boto kutxa elektronikoetatik zuzenean bidaliko dira Hauteskunde Batzorde Nagusira.

5. Hauteskunde mahaiak gehiengoz erabakitzen badu zenbaketa elektronikoaren kontra egindako protestak edo erreklamazioak onartzea, mahaiburuak jasota utziko du lehenengo zenbaketaren emaitza, eta bigarrenez zenbatuko ditu irakurgailu elektronikotik banan-banan berriro pasatuz kutxako txartel guztiak. Zenbaketa hori gailu egiaztatzailearen bidez baino ez da egingo. Ezin izango dira inondik inora boto elektronikoko txartelak ireki, txartelik ez kaltetzeko eta balioz emandako botorik ez baliogabetzeko.

6. Boto elektronikoak bigarrenez zenbatzeko, mahaiburuak boto kutxa irekiko du eta, denen aurrean, lehen esan bezala, banan-banan berriro ere pasatuko ditu mahaira ekarritako irakurgailu egiaztatzailetik. Mahaiburuak ozen irakurriko du txartel bakoitzaren bidez aukeratutako hautagaia, eta txartela bai mahaikideei, bai ikuskariei erakutsiko die.

7. Boto txartelen batek kanpoko aldean gorabeheraren bat balu, mahaiak Hauteskunde Batzorde Nagusiari bidaliko dio gainontzeko agiriekin batera, eta 20. artikuluan adierazitako aktan jasota utziko du bai gertaera, bai gertaerako arrazoiak ere.

Boto kutxaren gailu elektronikoa itxi eta zenbaketa elektronikoa hasita dagoela gorabeheraren batek 20. artikuluan zehaztutako akta betetzea eragozten badu, mahaiburuak beste boto kutxa elektroniko bat eskatuko du: kutxa berria martxan jarrita, kutxa zaharreko txartel guztiak atera eta banan-banan sartu eta erregistratuko ditu berrian. Mahaiburuak gorabehera horren berri eman beharko du 20. artikuluan zehaztutako aktan, eta Hauteskunde Batzorde Nagusiari jakinaraziko dio hartutako erabakia.

Ezinezkoa bada beste kutxa elektroniko bat lortzea, mahaiburuak, mahaikideen iritzia entzun ondoren, banan-banan zenbatuko ditu txartel guztiak irakurgailu elektronikotik berriro pasatuz, 31.6. artikuluan zehaztutakoaren arabera.

Mahaikideek sinatu egingo dituzte inpugnaziorik, erreklamaziorik edo zalantzarik eragindako txartelak, aktari erantsi eta artxibatu egingo dira. Gainontzeko txartelak suntsitu egingo dira jendaurrean.

Mahaiburuak, mahaikideek eta ikuskariek 20. artikuluan zehaztutako akta sinatuko dute. Ondoren, mahaiburuak berriro sartuko du kontrol txartela kutxako gailu elektronikoan kutxa behin betiko ixteko eta botazioan erregistratutako datu guztiak ezabatzeko. Behin hori eginda, mahaiburuak deskonektatu egingo du gailu elektronikoa.