- 88/2010 DEKRETUA, martxoaren 16koa, Etxebizitza, Herri Lan eta Garraio Saileko Estatistika Organo Espezifikoa sortu eta arautzen duena. - Legegunea: Euskal Herriko araudia - Eusko Jaurlaritza - Euskadi.eus
Arautegia
Inprimatu88/2010 DEKRETUA, martxoaren 16koa, Etxebizitza, Herri Lan eta Garraio Saileko Estatistika Organo Espezifikoa sortu eta arautzen duena.
Identifikazioa
- Lurralde-eremua: Autonomiko
- Arau-maila: Dekretua
- Organo arau-emailea: Etxebizitza, Herri Lan eta Garraio Saila
- Jadanekotasuna-egoera: Indargabetua
Aldizkari ofiziala
- Aldizkari ofiziala: EHAA (Euskal Herria)
- Aldizkari-zk.: 61
- Hurrenkera-zk.: 1859
- Xedapen-zk.: 88
- Xedapen-data: 2010/03/16
- Argitaratze-data: 2010/03/31
Gaikako eremua
- Gaia: Administrazioaren antolamendua; Ogasun eta Ekonomía
- Azpigaia: Gobernua eta herri administrazioa; Sailak; Ekonomia
Testu legala
Euskal Autonomia Erkidegoko Administrazioaren sailak sortu, ezabatu eta aldatzen dituen eta horien jardun-arloak finkatzen dituen lehendakariaren maiatzaren 8ko 4/2009 Dekretuak uztailaren 30eko 20/2009 Dekretuak aldatu zuenak aurreikusten du, batetik, Etxebizitza, Herri Lan eta Garraio Saila, eta bestetik, Enplegu eta Gizarte Gaietako Saila sortzea. Horretarako, elkartu egingo dira desagertutako Etxebizitza eta Gizarte Gaietako Sailaren eta Garraio eta Herri Lan Sailaren artean dekretua onartu aurretik banatuta zeuden egiteko eta jarduera-eremu batzuk.
Etxebizitza, Herri Lan eta Garraio Sailaren egitura organikoa ezarri zuen azaroaren 24ko 607/2009 Dekretuaren bigarren xedapen iragankorrak ahalbidetu du desagertutako Garraio eta Herri Lan Sailaren Estatistika Organo Espezifikoarekin jarraitzea, behin-behinekoz, harik eta dekretu hau onartzen den arte. Izan ere, organo horrek bere egiten ditu Etxebizitza Sailburuordetzaren egitekoak, hain zuzen ere, desagertutako Etxebizitza eta Gizarte Gaietako Sailaren Estatistika Organo Espezifikoa sortu zuen ekainaren 20ko 129/2006 Dekretuan jasotakoak.
Egitura berriaren ondorioz, aipatutako sailen Estatistika Organo Espezifikoak sortu zituzten arauak egokitu beharra dago (ekainaren 20ko 129/2006 Dekretua eta irailaren 11ko 144/2007 Dekretua, hurrenez hurren). EAEko estatistikaren alorreko araudiak aurreikusten du Estatistika Organo Espezifiko bakarra izan behar duela sail bakoitzak, eta egoera honetan, aipatutako dekretuetan jasotzen diren eremuak banatu beharra dago, baita bi estatistika-organo horiek egun dituzten baliabide pertsonalak ere.
Banaketarik egin beharrik ez izateko, azaroaren 24ko 607/2009 Dekretuaren xedapen indargabetzaileak dekretu honen bidez sortuko den Estatistika Organo Espezifiko berriari esleitzen dizkio lehendakariaren maiatzaren 8ko 4/2009 Dekretuan Etxebizitza, Herri Lan eta Garraio Sailari atxikitako jarduera-eremuetako gai guztiak, eta horien artean daude, Etxebizitza Sailburuordetzari dagozkionak, hain zuzen ere, ekainaren 20ko 129/2006 Dekretuak sortutako Estatistika Organo Espezifikoaren eskumenekoak izateari utzi diotenak.
Behin Estatistika Organo Espezifikoa sortzea ebatzita, organo hori arautzeko parametroak EAEko Estatistikari buruzko apirilaren 23ko 4/1986 Legean ezarritako esparruaren barruan kokatu behar dira. Izan ere, dekretu horren 26. artikuluak ahalbidetzen du, besteak beste, Estatistika Organo Espezifikoa eratuta duten sailek burutzea EAEko estatistikari buruzko jarduera. Legezko aurreikuspen horiekin bat, organoaren antolaketa eta funtzionamendurako, ekainaren 22ko 180/1993 Dekretuan ezarritakoari jarraitzen zaio. Dekretu horrek Jaurlaritzaren sailen Estatistika Organo Espezifikoak arautu zituen, bereziki, organo horien sorrera, antolaketa eta funtzionamendua, eta bertan ezarri zen Estatistika Organo Espezifikotzat joko direla, bakar-bakarrik, dekretuaren arauen arabera eratu direnak.
Betekizun formalei dagokienez, ekainaren 22ko 180/1993 Dekretuak ezartzen du Estatistikarako Organo Espezifikoak dekretu baten bidez sortuko direla, eta pertsona bakarreko organo gisa eratuko direla, hain zuzen ere, goi-kargudun batekiko edo sailean koordinazio-funtzioak dituen beste organo batekiko menpekotasun zuzena izango duen organo gisa. Kasu honetan, Estatistika Organo Espezifikoa Zerbitzu zuzendariaren menpe egongo da, kargu horrek betetzen baititu aipatutako koordinazio-eskakizunak.
Dekretua Xedapen Orokorrak Egiteko Prozedurari buruzko abenduaren 22ko 8/2003 Dekretuaren arabera izapidetu da, behin 180/1993 Dekretuan aurreikusitako Euskal Estatistika Batzordearen nahitaezko txostena jaso ondoren, eta sailaren jarduera-eremu berriaren behar eta jarduera-proiektuak kontuan hartuta.
Horiek horrela, Etxebizitza, Herri Lan eta Garraioetako sailburuaren proposamenez, Euskal Estatistika Batzordeak txostena eman ondoren, eta Jaurlaritzaren Kontseiluak 2010eko martxoaren 16an egindako bilkuran aztertu eta onartu ondoren, hauxe
Dekretu honen bidez, Etxebizitza, Herri Lan eta Garraio Saileko Estatistika Organo Espezifikoa sortu eta bere antolaketa eta funtzionamendua ezartzen dira, Jaurlaritzako sailen Estatistikarako Organo Espezifikoak arautzen dituen ekainaren 22ko 180/1993 Dekretuko aginduen arabera.
Etxebizitza, Herri Lan eta Garraio Saileko Estatistika Organo Espezifikoa pertsona bakarreko organoa da, eta Saileko Zerbitzu zuzendariaren menpe dago zuzenean.
Etxebizitza, Herri Lan eta Garraio Saileko Estatistika Organo Espezifikoa I. motako organo modura eratzen da eskumen ondorioetarako. Hori dela-eta, mota horretako Estatistika Organo Espezifikoei 180/1993 Dekretuak esleitzen dizkien eskumenez eta ahalmenez baliatuko da. Zehazki, honako hauez:
Sailaren Estatistika Plana lantzea, zeina Estatistikaren Euskal Planaren Proiektuaren oinarria izango baita.
Euskal Estatistika Erakundearekin batera lan egitea Estatistikaren Euskal Plana eta Urteko Programa Estatistikoak lantzen.
Urteko Programa Estatistikoetan txertatutako estatistikak edo estatistika-faseak lantzea, programa horietan zehaztutako moduan.
Estatistika propioak lantzea, Estatistikaren Euskal Planean edo Urteko Estatistika Programetan txertatu gabekoak, 4/1986 Legeko 8.1. artikuluan ezarritako eran.
Artikulu honetako c) eta d) idatz-zatietan jasotako eginkizun estatistikoak direla-eta, beste erakunde batzuekiko harremanak, betiere 4/1986 Legearen 29. artikuluko c) eta d) idatz-zatietan ezarritako guztia betez.
Bere eskumeneko estatistikak gauzatzeko informazioa lortzea, 4/1986 Legeko 9. artikulutik 16. artikulura xedatutako eran.
Artikulu honetako d) idatz-zatian adierazitako estatistiken emaitzak eta Urteko Programa Estatistikoetan zehaztutakoak argitaratu eta zabaltzea, edukiaren berri Euskal Estatistika Erakundeari jakinarazi ondoren.
Bere arloko fitxategi-direktorio estatistikoak landu eta eguneratzen parte hartzea 4/1986 Legearen 29.i) artikuluan xedatutakoaren arabera.
Etxebizitza, Herri Lan eta Garraio Sailak interesgarritzat jotako proiektuak burutzea, batik bat sektorekako eta azpisektorekako zerbitzuak, azterlanak eta analisiak, 180/1993 Dekretuko 7.2 artikuluan ezarritako esparruan.
Etxebizitza, Herri Lan eta Garraio Saileko Estatistika Organo Espezifikoa bere eskumenez baliatuko da, bai sail horrek dituen premia estatistikoei dagokienez, bai, Euskal Estatistika Erakundeaz gain, berak atxikita dituen erakundeei dagokienez, betiere kontuan hartuz estatistikak datu estatistikoetatik edo datu administratiboetatik abiatuz landu behar direla.
Etxebizitza, Herri Lan eta Garraio Saileko Estatistika Organo Espezifikoak errespetatu egin beharko ditu estatistikek eragindako arloetan sail horren menpeko organo eta instantziei legez esleitutako eskumenak. Estatistika Organo Espezifikoak bere eskumenez baliatzeko behar duen informazioa jasoko du organo horietatik.
Etxebizitza, Herri Lan eta Garraio Saileko Estatistika Organo Espezifikoak, 180/1993 Dekretuko 4. artikuluan jasotako Estatistika Organo Espezifikoen Erregistroan inskribatu ondoren, EAEko Estatistikaren arloko jardunari ekingo dio, estatistikako legeak betez beste organo eta enteekin eta bere Sailari atxikitakoekin dituen harremanetan.
Etxebizitza, Herri Lan eta Garraioetako sailburuak eskumena izango du Etxebizitza, Herri Lan eta Garraio Saileko Estatistika Organo Espezifikoaren egintzen aurka ezartzen diren errekurtsoez arduratzeko eta horien gainean ebazteko.
Errekurtso horien gainean ebazpena eman aurretik, Euskal Estatistika Erakundeak txostena eman behar du.
Baliogabetu egiten da irailaren 11ko 144/2007 Dekretua, Garraio eta Herri Lan Saileko Berariazko Organo Estatistikoa sortu eta bere antolaera eta funtzionamendua ezartzen dituena. Halaber, baliogabetu egiten da Etxebizitza eta Gizarte Gaietako Sailaren Estatistikarako Organo Berezia sortu zuen ekainaren 20ko 129/2006 Dekretua.
Lehenengoa. Etxebizitza, Herri Lan eta Garraioetako sailburuari eskumena ematen zaio dekretu hau garatu eta gauzatzeko beharrezkoak diren xedapenak emateko.
Bigarrena. Euskal Herriko Agintaritzaren Aldizkarian argitaratu eta hurrengo egunean hartuko du indarra dekretu honek.
Vitoria-Gasteizen, 2010eko martxoaren 16an.
Lehendakaria,
FRANCISCO JAVIER LÓPEZ ÁLVAREZ.
Etxebizitza, Herri Lan eta Garraioetako sailburua,
IGNACIO MARÍA ARRIOLA LÓPEZ.
Gaiarekin lotutako edukiak
Arauaren historia (6)
- Partzialki indargabetutakoa: 448/2013 DEKRETUA, azaroaren 19koa, Ingurumen eta Lurralde Politika Saileko Estatistika Organo Berezia sortzeko eta horren antolaketa eta funtzionamendua ezartzeko dena.
- Indargabetutakoa: 472/2013DEKRETUA, abenduaren 30ekoa, Enplegu eta Gizarte Politiketako Sailaren estatistika-organo espezifikoa sortzekoa eta haren antolaketa eta funtzionamendua zehaztekoa.
- Indargabetzen du: 144/2007 DEKRETUA, irailaren 11koa, Garraio eta Herri Lan Saileko Berariazko Organo Estatistikoa sortu eta bere antolaera eta funtzionamendua ezartzen dituena.
- Ikus: 191/2013 DEKRETUA, apirilaren 9koa, Enplegu eta Gizarte Politiketako Sailaren egitura organikoa eta funtzionala ezartzen duena.
- Ikus: 196/2013 DEKRETUA, apirilaren 9koa, Ingurumen eta Lurralde Politika Sailaren egitura organikoa eta funtzionala ezartzeko dena.
- Indargabetzen du: 129/2006 DEKRETUA, ekainaren 20koa, Etxebizitza eta Gizarte Gaietako Sailaren Estatistikarako Organo Berezia sortu eta haren antolamendua eta funtzionamendua ezartzen duena.